Википедија е енциклопедија која се гради од заедницата и за заедницата. Со тоа, создавањето и уредувањето на статии на Википедија не е само начин на проширување на знаењето, туку и можност да се придонесе за достапноста на енциклопедиски информации на македонски јазик. Викимедија МКД го препознава значењето на добро структурираните и прецизно уредени статии, затоа и оваа година организира уредувачки натпревар за средување на статии кој ќе се одржи од 4 ноември до 3 декември 2024 година.
Овој натпревар има за цел да поттикне уредување и подобрување на постоечките статии на Википедија на македонски јазик, со што енциклопедијата ќе стане уште покорисна и поквалитетна за користење. Натпреварот е одлична можност за сите искусни уредници да го покажат своето знаење и вештини во уредувањето, како и да се натпреваруваат за вредни награди.
Натпреварот е насочен кон средување на статии кои се обележани со предлошките {{Внимание}}, {{Викификација}} и {{Без извори}}, како и кон решавање на проблемите со прикажувањето на параметрите во статиите. Учесниците се охрабруваат не само да ги уредуваат овие статии, туку и да ги дополнуваат со релевантни информации, особено ако се работи за кратки содржини.
Сите регистрирани искусни корисници на Википедија на македонски јазик, освен членовите на оценувачкиот одбор, можат да учествуваат доколку ги исполнуваат следните два критериума:
- Имаат направено најмалку 5.000 уредувања до почетокот на натпреварот,
- Поминати се најмалку пет години од нивното прво уредување на Википедија на македонски јазик.
За најуспешните уредници, Викимедија МКД обезбедува вредносни награди:
- I награда: вредносен купон од 12.000 денари
- II награда: вредносен купон од 6.000 денари
- III награда: вредносен купон од 3.000 денари
Дополнителни награди се предвидени за:
- Најдобра статија: вредносен купон од 5.000 денари
- Најдобар нов учесник: вредносен купон од 2.000 денари
Минимумот за освојување на награда е уредување или создавање на најмалку 25 статии.
Ајде заедно да ја направиме Википедија подобра за сите нас! Учествувајте, покажете го вашето знаење и освојте награди.