На 27 септември 2018 година, Википедијанците, членовите на ГЛАМ Македонија и пријателите имаа можност да го посетат Археолошкиот музеј на Македонија во Скопје. Присутните имаа можност да се запознаат со работата на овој музеј, како и да ги разгледаат поставките на музејот.
Во деновите од 7 до 9 септември 2018 година во хотел Полин во Дојран се одржа вториот Вики Камп за малолетни ученици во организација на Здружението на граѓани ГЛАМ Македонија од Скопје. На Вики Кампот учествуваа 46 ученици од повеќе од 10 основни и средни школи во Македонија.
Учесниците на Вики Кампот уредуваа статии на разни теми, се дружеа и се забавуваа. Покрај уредување на Википедија на македонски јазик, учесниците имаа можност да ја посетат околината, како и црквата „Св. Илија“.
Во текот на трите дена беа создадени околу 300 нови статии на Википедија на македонски јазик, а најдобрите и најуспешните беа наградени.
Сите слики може да се видат на следниот линк WIKICAMP Doyran
Денеска, 7 септември заминуваме на Вики Камп во Дојран. Подгответе ги прстињата за уредување, подгответе се за забава и уживање. Резултатите ќе ги објавиме наредната недела.
За потсетување како беше минатата година 🙂
За сите активности на Здружението зборува Снежана Штрковска, претседател на ГЛАМ Македонија: „Целта е да ја направиме Википедија на македонски јазик место каде може да се прочитаат точни информации.“
Целото интервју на следниот линк http://kulturno.mk/2018/09/01/intervju-na-nedelata-snezana-strkovska-direktor-na-glam/
ГЛАМ Македонија и оваа година е во подготовки за организирање на Вики Камп 2018. Љубителите на Википедија и младите корисници ќе имаат можност преку забава, дружба и едукативни активности подетално да ја запознаат Википедија, да придонесат со нови статии и содржини и да ја збогатат оваа семрежна слободна енциклопедија на македонски јазик. Оваа година Вики Камп се сели во Дојран, во хотел „Полин“. Успехот на минатогодишниот камп „Вики Камп Берово 2017“ дава уште поголема мотивација и очекуваме дека успехот и резултатите на „Вики Камп Дојран 2018“ ќе ги надминат нашите очекувања. Тродневниот камп ќе се одржи од 7 до 9 септември 2018 година. Учесниците на „Вики Камп Дојран 2018“ година ќе имаат можност да ги подобрат своите уредувачки вештини, да научат како се пишува академски текст, како да се објави на Википедија и активно да учествуваат во збогатувањето на оваа енциклопедија на македонски јазик. Забавата, спортско-рекреативните активности, дружбата и новите пријателства се неизбежни, и срдечно посакуваме и овој Вики Камп да биде исто така успешен настан кој ќе биде корисен како за учесниците така и за самата Википедија. Се гледаме во Дојран на 7 септември!
По четиринаесетти пат се одржа годишната конференција на Википедијанци од целиот свет,
годинава во Кејп Таун, Јужна Африка. Програмата беше разновидна, а имаше и постојани сесии на
кои почетниците можеа да научат како се уредува на Википедија и на Вики податоци.
Нашиот претставник имаше свое излагање на тема: „Соработка меѓу ГЛАМ и образование“,
односно, претставување на македонските активности на таа тема.
Меѓу другите сесии, би ја издвоиле дискусијата на тема родова нееднаквост, што можеме да
научиме од феминистичките групи, сесиите посветени на програмата ГЛАМ, како и средбите меѓу
организаторите на настани, и посебно средбата на претставниците од земјите од регионот на
централна и источна Европа.
Наредната година, Викиманија ќе се одржи во Шведска.
Нашиот претставник на конференцијата
Дискусија за родова нееднаквост
Настап на универзитетскиот хор од Кејптаун на завршната сесија
Заедничка фотографија на претставниците од регионот на централна и источна Европа
Ново наградно уредување во организација на здружението Викимедија Ерменија, а по повод 2800 годишнината на градот Ереван. На проектната страница се посочени 270 статии, сите поврзани со градот Ереван, за кои е потребен превод на други јазици, секако и на македонски јазик. Натпреварот ќе трае од 15 јуни до 15 јули 2018 година, односно статиите создадени или подобрени во тој период ќе бидат земени предвид.
За највредните е обезбедена награда: посета на Ереван за време на одржување на прославата во градот, односно во деновите 29 и 30 септември 2018 година.
Повеќе информации на следниот линк: Wiki loves Yerevan.
Во организација на Матичниот Википедијанец во Градската библиотека „Браќа Миладиновци“ во Скопје, Гордана Јовиќ-Стојковска, организирана е уредувачка активност за збогатување и подобрување на Википедија на македонски јазик на тема „Прва светска војна“.
Во уредувањето кое се реализираше во периодот од 10 – 13 јуни 2018 година, учествуваа 12 Википедијанци кои внесоа 21 нови страници, а 25 статии беа надополнети и подобрени.
Во рамки на активностите организирани од страна на Матичниот Википедијанец ваква уредувачка активност беше реализирана и во месецот април во кој учествуваа 18 Википедијанци.
Уредувачките активности на зададената тема „Прва светска војна“ беше предизвик и за членовите на Вики клубот од Старо Нагоричане кои со својот раководител, наставничката Стојна Арсова- Донева подигнаа 11 статии.
Придружувајќи се на обележувањето на 100 години од крајот на Прва светска војна Википедијанците од ГЛАМ Македонија ќе продолжат да ја обработиваат оваа тема.
На 4 јуни 2018 година, во организација на матичниот Википедијанец, Гордана Јовиќ- Стојковска, во Градската библиотека „Браќа Миладиновци“ во Скопје беше организирана посета за членовите на Вики клубот, сите ученици од ОУ „Свети Климент Охридски“ од Драчево. Википедијанците беа запознаени со капацитетите на библиотеката, со начините на користење на стручната литература, како и со читалните и атрактивни програми што ги организира библиотеката. На Википедијанците им беше овозможено да ја видат книговезницата во која се обновуваат многу од користените книги, а посебен интерес предизвика средбата со одделот за периодика.
Младите Википедијанци се запознаа со богатата збирка на дневен, неделен, месечен и периодичен печат од првите броеви на весниците објавувани на територија на Македонија. Мотивирани од исцрпни објаснувања од страна на нивната домаќинка на средбата, Валентина Малиќ-Андоновска, Википедијанците понудија нов вид на соработка: пребарување и подигање текстови од старите броеви на списанијата и весниците во склад со потребите на Википедија на македонски јазик. За ваква идна соработка интерес покажа и Библиотеката.
Во текот на првите четири месеци од 2018 година, активностите на членовите на ГЛАМ Македонија поврзани со ГЛАМ институциите (галерии, библиотеки, архиви и музеи) во Република Македонија беа плодни.
Годинава беа потпишани четири договори за соработка, и тоа: нов договор со Институт за национална историја, и обновени договори со Државниот архив на РМ, со Музеј на македонската борба Скопје и со градската библиотека „Браќа Миладиновци“ во Скопје.
Како резултат на овие договори за соработка, членовите на ГЛАМ Македонија ја збогатија Википедија на македонски јазик, со тоа што: создадоа 250 нови статии, 104 постоечки статии беа подобрени, 200 референци беа внесени и 25 слики беа подигнати.
Главните теми на кои се работеше најмногу беа: Првата и Втората светска војна, како и активностите на партизаните во Македонија.
