blog

На 18 и 19 мај 2024 година се одржа осмата по ред „Викилајв конференција“ во Белград, Србија.

Конференцијата беше одржана во СКИП центарот, во рамки на Министерството за државна управа и локална самоуправа. Викилајв конференцијата беше под мотото „Споени во знаењето“, а учествуваа околу 70 уредувачи и соработници на проектите. Се одржаа многубројни предавања, панел дискусии, дружење и споделување на проекти поврзани со Википедија, сè до разговори за тоа како алатките на вештачката интелигенција може да помогнат за Википедија.

Оваа година, од Македонија учествуваа Нино Богдановски и Кирил Симеоновски, и двајцата членови на Извршниот одбор на Викимедија МКД, како и Тони Ристовски, кој беше учесник како претставник на ЦИЕ хаб. Предавањата со кои Кирил и Нино претставија дел од активностите на македонската заедница беа: Содржини на знаковен јазик како нова форма на знаење, и претставувањето на Викиобука што ќе се одржи во Преспа на почеток на септември.

„Мене лично ми е второ учество на оваа конференција која има и мал регионален карактер. Лично сметам дека ваквиот тип на настани се одличен начин да се види што се работи во регионот на тема Википедија и сите Викимедини проекти, можност е да се добие некоја идеја плус, како и потенцијал да се склучи или разработи некој проект кој би имал меѓуграничен карактер“ – ијзави Нино Богдановски.

Конференцијата заврши со сесијата „На кафе со Викимедија“, кога присутните имаа можност да поставуваат прашања на членовите на Управниот одбор на Викимедија Србија, а потоа со доделување на наградата Викимедија „Бранислав Јовановиќ“. Ова е годишна награда која Викимедија Србија ја доделува на уредниците на Википедија на српски јазик за нивниот придонес во ширењето на слободното знаење. Овогодинешниот добитник на наградата е Бранка Вучиќевиќ Вучковиќ, која го води проектот „Надгробни споменици во Србија“.

Учесниците се здобија со сертификати за следење и присуство на конференцијата.

На фотографиите може да ги видите сите учесници на Викилајв, дел од атмосферата, како и претставниците од Македонија.

 

Со организирањето на уредувачки натпревари и уредувачки маратони, Викимедија МКД создава нови можности за поголемо збогатување на Википедија на македонски јазик. Преку ваквите програмски активности, Викимедија МКД се обидува да ја зголеми слободната содржина на македонски јазик. Со различни теми, но со иста цел, уредувачките натпревари и маратони даваат и различни можности за добивање награди на учесниците кои се пројавиле.

Овој пат, Викимедија МКД организираше уредувачки маратон на тема „Чајанка“. По повод Светскиот ден на чајот, 21 мај 2024, Викимедија МКД ги повика сите свои членови и уредници на Википедија да учествуваат на овој повик и да напишат статии на тема „чај“. Уредувачкиот маратон траеше преку целиот ден, а за овој маратон беше предвидена и една награда доделена по случен избор на некој од учесниците. Новина која беше воведена за прв пат беше емитување во живо преку Инстаграм профилот на Викимедија МКД. Емитувањето се одвиваше на 23 мај 2024 и по случаен избор со влечење беше прогласен еден добитник на награда.

Уредувачкиот маратон се покажа доста успешен и Википедија на македонски јазик се стекна со 56 нови статии за чајот.

Добитник на награда е корисник Драгана Васил со статијата „Дегустација на чај”.

Викимедија МКД продолжува со реализација на нови програми, понуда на нов едукативен материјал и слободни содржини за македонската публика. Преку својот проект „Викиекспедиции“, Викимедија МКД истражува, документира и енциклопедиски презентира места и локалитети од сите делови на Македонија.

Оваа година во периодот од 26 до 28 април 2024 година тимот на Викимедија МКД ја одржа својата прва викиекспедиција за 2024. Штипската околина, со своите преубави села, природни убавини и историско-културни споменици беше мета на нашите истражувачи кои собраа голем број податоци, фотографии и видео записи. Тимот составен од пет члена, Википедијанци и членови на Викимедија МКД, својот истражувачки поход го започнаа со сместување во Свети Николе, како најпогодно место за целите на истражувањето.

Првиот ден започна со посета на градот Штип. По краткиот престој тимот набрзо се упати кон најоддалеченото село во општината, село Брест. По фотографирањето на локалниот манастир и месноста Пилав Тепе, тимот се упати кон документирање на историското село Ново Село. Понатака, екипата се упати кон селото Горачино, но и селото Танатарци. По документирањето на овие села, истражувачите се упатија кон селото Патрик, кое  е историско село, а потоа и селото Пиперево кое е сместено на Серта. Документирањето продолжи со сликање, снимање и собирање на податоци на селата Лесковица, Суво грло, Степанци, Балталија, Лакавица, Пухче, Селце, Драгоево, Пенуш и на крај на денот селото Софилари.

По помината ноќ во Свети Николе, тимот продолжи со истражување на спротивната страна – Плачковица. Првото село од следниот ден кое беше снимено и забележано од камерите беше селото Шашаварлија, а потоа следни за соодветен видео и фотографски запис беа селата Никоман, Калапетровци, Кошево и кањонот Камник. Експедицијата продолжи кон селата Почивало, Стар Караорман, Чардаклија, Судик, Врсаково, историското село Крњевци, Долани, Љуботен, Чифлик и на крај Липов Дол

Експедицијата, како и минатите, беше продуктивна и голем број материјали беа собрани за селата од овој регион. Со посетени 30 села, 2 историски села и поминати 600 километри пат, тимот детално и сеопфатно открива на нашата заедница уште едно парче убавина и историско-културна целина на Македонија.

Викимедија МКД како невладина организација која се стреми кон развој на програмски и волонтерски план се заснова, покрај другото, и на транспарентноста при нејзиното работење. Запознавањето на пошироката заедница со програмските активности, новости, буџетските и организациските работи на организацијата е клучен момент за развојот на самата организација, како на програмски така и на волонтерски план. Со основањето на Викимедија МКД се воспостави и нова организациска структура, односно нов претседател, извршен одбор и вработени лица во организацијата. Бидејќи сакаме да ја запознаеме пошироката јавност со раководните лица на Викимедија, ви претставуваме кратки фактографски податоци на лицата кои се дел од организациската структура на Викимедија МКД.

Претседател:

Николче Стојаноски (1987) е активен Википедијанец, долгогодишен администратор и бирократ на Википедија на македонски, администратор и активен уредник на Викиизвор, и голем придонесувач за македонски теми на Заедничката ризница. Со Википедија започнува да се занимавата од 2007 година, а енциклопедијата до денес е дел од неговиот професионален и приватен живот.

Николче Стојаноски е дипломиран професор по англиски јазик и книжевност, магистер по настава на англиски јазик и овластен преведувач од македонски јазик на англиски и обратно. Своето образование го заокружува во 2009 година, кога ги завршува студиите од вториот циклус, а паралелно се стекнува со правото на постојан судски преведувач од англиски на македонски и обратно. Паралелно со своите студии и образование, Николче активно се вклучува и во работата на Википедија на македонски јазик, а малку подоцна и Викиизвор на македонски јазик. Со своето корисничко име на Википедија опстојува од 22 декември 2007 година, кога ги прави првите уредувања на Википедија. Главни интереси за уредување и придонесување на енциклопедијата за него се јазиците, лингвистиката, географијата, историјата и книжевноста. Посветеноста на Википедија и уредувањето на енциклопедијата, а притоа следењето на основните начела и принципи на енциклопедијата, му довело до успешна кандидатура за администратор на Википедија на македонски јазик. Денес тој е еден од корисниците со најголем број придонеси на Википедија, администратор на Википедија на македонски јазик од 15 март 2009 година, бирократ на Википедија на македонски јазик од 23 април 2013 година и администратор и најголем придонесувач на Викиизвор на македонски јазик.

Своите придонеси Николче ги насочува и кон невладиниот сектор кој работите со активности и проекти поврзани со Движењето Викимедија. Набрзо од самото основање на ГЛАМ Македонија, Николче станува основач и член на одборот на здружението, кое патем е претходник на Викимедија МКД. Заедно со тимот, ГЛАМ Македонија има успешно завршено голем број проекти, настани, конференции, работилници, предавања, кампови  и останати сродни активности поврзани со проектите на Викимедија. Со основањето на Викимедија МКД, Николче станува еден од основачите на здружението, член на извршен одбор и од април 2024 година претседател на Викимедија МКД.

Познат на Википедија под корисничкото име MacedonianBoy, Николче и денес продолжува да ја поддржува македонската вики-заедницата на Википедија и во рамките на проектите на Викимедија МКД.

Извршен одбор:

Кирил Симеоновски (1990) дипломирал, магистрирал и докторирал на Економскиот факултет при Универзитетот „Св. Кирил и Методиј“ во Скопје. Работи во Народна банка на РСМ.

Википедијанец од 2008 година и администратор на Википедија на македонски јазик. Кирил Симеоновски бил претседател на здружението „Споделено знаење“, и со тимот на тоа здружение има успешно завршени бројни проекти и активности. Со основањето на Викимедија МКД, Кирил станува еден од основачите на здружението, и член на извршниот одбор.

Кирил се докажал и продолжува да биде активен во рамки на Википедијанските меѓународни активности, како претседател на меѓународни комитети, а годинава е и член на програмскиот комитет за најголемата википедијанска конференција, Викиманија 2024.

 

 

Лили Арсова (1967) живее и работи во Велес. Дипломирала на Универзитетот „Св.Кирил и Методиј“ во Скопје. Работи како професор во одделенска настава. За својата работа како наставник со ученици е наградувана на многу меѓународни и интернационални конкурси. Добитник е и на највисокото признание во 2018 година кога е прогласена за просветен работник на Репубика Македонија. Писател на литература за деца  и млади има издадено осум книги со проза и драмски текстови. Во Википедија на македонски јазик е член од  9 октомври 2017 година, а од 18 февруари 2020 година е и координатор на Вики клуб Велес. Лили Арсова е вклучена во бројни активности и проекти поврзани со Википедија: учество на работилници, Вики кампови, организирање на настани, среби, конференции за наставници, предавања и уредувачки маратони во Велес, а ангажирана е и како матичен Википедијанец веќе неколку години по ред. Активно уредува на Википедија на македонски јазик и на Викиизвор на македонски јазик.

 

 

Деан Лазаревски (1991) дипломиран економист на насоката е-бизнис на Економскиот факултет при Универзитетот „Св. Кирил и Методиј“ во Скопје во 2014 година. Моментално ги завршува магистерските студии на истиот факултет од областа на менаџмент на е-бизнис. Работните должности од 2018 година ги извршува во Општина Гази Баба, а од ноември 2022 е задолжен за буџетот и финансиските текови во Кабинетот на Претседателот на Републиката. Во 2019 година се приклучува кон тимот „Викиекспедиции” во кој активно учествува во десетици истражувачки проекти кои главно се насочени кон документирање на историските и природните знаменитости. Исто така ги извршува и задолженијата за промоција на експедициите на социјалните мрежни, со што ги запознава сите кои сакаат да добијат повеќе информации за овој дел од активностите. Деан е дел и од други проекти поврзани со Википедија.

 

 

Валентина Трајковска (1976) е магистер по филолошки науки и дипломиран професор по македонска книжевност и јужнословенски книжевности. Предава македонски јазик во ОУ „Свети Климент Охридски” во Драчево, Скопје.

Активен Википедијанец од 2016 година, кога се вклучува како координатор на Вики клубот во Драчево. Валентина заедно со своите ученици – членови на Вики клубот, има учествувано и има организирано бројни проекти, од Вики кампови, работилници, конференции за наставници и други активности поврзани со Википедија.

 

 

 

Нино Богдановски (1991) дипломиран економист на Економскиот факултет при Универзитетот „Св. Кирил и Методиј“ во Скопје. Во моментов вработен во компанијата за транспорт и логистика Кине и Нагел Македонија

Во 2015 година се вклучува на проекти поврзани со Википедија на македонски јазик, и со тимот „Викиекспедиции” активно учествува во триесетина истражувачки проекти. Се јавува и како организатор и дел од други википедијански проекти, како на пример проектите и активностите поврзани со луѓе во Македонија што зборуваат на аромански и ромски јазик и луѓе кои користат знаковен јазик. Во моментов работи на конференцијата за обука на заедници од ЦЕЕ регионот за Викиекспедиции во нивните матични земји.

 

За прв пат Викимедија МКД го одбележува Меѓународниот ден на џезот – 30 април. Џез музиката, како една од поголемите музички правци, својата популарност ја има насекаде во светот, а македонската џез заедница и љубителите на овој музички правец добија уште еден настан во Скопје со кој се одбележа овој ден.

Со почеток од 17:00 часот на 30 април 2024 година Викимедија МКД организираше забавно-уредувачки настан во бифе „Тафталиџе“ во Скопје. Настанот беше замислен и организиран да има и забавен и уредувачки карактер. Следствено на тоа, Викимедија МКД ги повика сите свои членови, поддржувачи и активисти, како и сите љубители на џезот кои можат да одвојат дел од своето време, да дојдат на заедничка дружба со џез музика. Притоа, сите присутни лица кои заедно уживаа во звучите на џезот, дадоа свој придонес и на Википедија на македонски јазик. Повикот за придонес на нови статии и содржини поврзани со џезот траеше преку целиот ден, кога сета македонска вики-заедница имаше можност да напише статија поврзана со џезот.

Денот на џезот кој се одбележа во Скопје помина во фантастично пријатна атмосфера, одлична дружба, голем број нови статии и подлабоко проучување на џезот и неговата магија. На самиот настан во Скопје присутни беа 25 лица – членови, волонтери и поддржувачи на Викимедија МКД и љубители на џезот. Во опуштена и релаксирачка атмосфера нашата заедница се приклучи кон глобалните прослави по повод Меѓународниот ден на џезот. Дополнително, Википедија на македонски јазик се стекна со 29 нови статии поврзани со џезот, со што енциклопедијата доби нови одлично сработени содржини и информации.

Сакаме да ви ја доловиме атмосферата преку фотографски материјал, каде џезот беше во фокусот на вниманието на секое лице коe дојде да се дружи со звуците на саксофонот.

Почетокот на 2024 година се покажа како успешен период во однос на активностите на Викимедија МКД. На низата успеси се надоврзува и успешно завршениот уредувачки натпревар „Генетика“. Натпреварот траеше од 1 февруари 2024 и заврши на 29 февруари 2024 година.

На натпреварот учествуваа повеќе уредници кои придонесоа со своите знаења и вештини. Темата на овој натпревар беше генетиката, односно објавување нови статии и подобрување на постоечките од оваа област. Со таквото објавување на нови содржини и подобрување на постоечките, учесниците овозможуваат пристап до квалитетни информации за сите корисници на Википедија.

Оценувањето на статиите беше задача на оценувачкиот одбор, составен од искусни википедијанци, кои внимателно ги анализираа и оценија содржините според стандардите и правилата на Википедија. Процесот на оценување беше траен и темелен, осигурувајќи објективност и квалитет во изборот на победниците. Така, со гордост ги објавуваме добитниците на наградите:

• I награда: [Dandarmkd] – вредносен купон во вредност од 12.000 денари.
• II награда: [Тиверполник] – вредносен купон во вредност од 6.000 денари.
• III награда: [Bojan9Spasovski] – вредносен купон во вредност од 3.000 денари.

Покрај овие награди, се доделуваат и следните дополнителни награди:

• Награда за најдобра статија: [Dandarmkd] – вредносен купон во вредност од 5.000 денари.
• Награда за најдобар нов учесник: [Lili Arsova] – вредносен купон во вредност од 2.000 денари.
• Посебна награда за најмногу статии за различните човечки хаплогрупи: [Bojan9Spasovski] – вредносен купон во вредност од 3.000 денари.

Вкупно учествуваа 10 уредници и беа напишани 491 статија.

Оваа иницијатива не само што го зголеми интересот за генетиката на Википедија, туку и го збогати нашето знаење и разбирање за важноста на оваа наука во современиот свет.

Благодариме на сите учесници за нивните напори и нивниот придонес.

Викимедија МКД остварува нови контакти и нови соработки сè со цел идеите и целите на здружението да допрат до што поголема маса на луѓе и организации. Новата соработка на Викимедија МКД овој пат е со Македонско здружение на млади правници (МЗМП) од Скопје – организација со сериозен карактер, богата програмска содржина и членови.

На 23 април 2024 година во просториите на Македонското здружение на млади правници беше организиран настан чија основна цел беше обука на вработени и членови на Здружението. Настанот беше составен од два дела, односно теоретско предавање за основните начела и принципи на Википедија, а вториот дел почетно уредување на Википедија на кое му претходеше отворање на кориснички сметки на самата Википедија.

Настанот беше започнат во 10:00 часот во просториите на Македонско здружение на млади правници. Извршниот директор на Викимедија МКД, Снежана Штрковска, го отвори самиот настан при што ги претстави основните функции и начела на Википедија во однос на функционирањето на енциклопедијата, нејзиното уредување и одржување на веродостојноста на содржините. По овој теоретски дел, следуваше отворање на нови сметки на учесниците на настанот, воведна обука и придонесување на содржини на Википедија. Така, 9-те учесници на настанот отворија свои кориснички сметки и објавија содржини на Википедија на македонски јазик на тема „право“.

Покрај обуката која учесниците ја добија со овој настан, Википедија се стекна со нови 9 корисници, а воедно и со нови 9 статии од областа на правото.

Ви пренесуваме дел од атмосферата на настанот одржан во Скопје на 23 април 2024 година.

 

Програмата „ГЛАМ“ на Викимедија МКД оваа година, како и изминатите, има тематски карактер. Активностите од оваа програма се посветени на подобрување на постоечката и создавање нови содржина на Википедија на македонски јазик и нејзините сродни проекти на тема „Клима и климатски промени“. Викимедија МКД ги следи актулените заложби на пошироката околина и светски движења и дава свој придонес кон глобалната цел на зададената тематика.

Викимедија МКД во соработка со Здружението „Вила Зора“ од Велес и Локалната библиотека „Гоце Делчев“ и ученици од Еколошката секција од ООУ „Васил Главинов” под раководство на координаторот Лили Арсова, во просториите на Локалната библиотека „Гоце Делчев” во Велес на 18.04.2024 година, со почеток во 10 и 30 часот се одржа предавање и работилница на тема „Клима и климатски промени”.

На самата работилницата, покрај членови и поддржувачи на Викимедија МКД, учествуваа и ученици од Вики клубот во Велес, како и членови на клубот Вики Сениор. На работилницата присутни беа вкупно 27 лица. Работилницата, која е дел од серијата настани и активности посветени на климатските промени, беше составена од теоретски дел на кој беа одржани предавања на темата, како и практичен дел посветен на активно придонесување на Википедија со преведување на статии за клима и климатски промени.

На работилницата воведно предавање одржа Олгица Наумоска, вработена во здружението „Вила Зора” која се осврна на климатските промени и нивната улога во екосистемот и начините за заштита на животната средина од климатските промени. По неа се обрати претседателката на здружението Сашка Коцевска која зборуваше за активностите на здружението во заштитата на животната средина. На крај се обрати Лили Арсова, член на извршниот одбор на Викимедија МКД која зборуваше за активностите на Викимедија МКД и спомна дека годишната ГЛАМ програма е темата „Клима и климатски промени” со цел подигање на свеста кај граѓаните.

По предавањата учесниците заеднички почнаа да уредуваат и придонесуваат на Википедија на македонски јазик на тема „Клима и климатски промени“. Вкупно се напишаа 36 статии од 14  уредници.

Ви пренесуваме дел од атмосферата на работилницата која беше доста продуктивна и едукативна.

 

 

Секоја година на 8-ми април, Викимедија МКД се приклучува на глобалната иницијатива за одбележување на Меѓународниот ден на Ромите. Оваа иницијатива има за цел да ја подигне свеста и да ја зголеми покриеноста за ромската култура на Википедија. Меѓународната иницијатива е во времетраење во периодот 1-15 април 2024 година, а заедницата на Википедија на македонски јазик се вклучи во уредувачки потфати, со цел создавање и подобрување на содржини поврзани со Ромите и нивната култура.

Во рамките на оваа иницијатива, се организираа различни активности како што се уредувачки викенд и уредувачки ден посветени на теми поврзани со Ромите. Така, уредувачкиот викенд на тема „Ромска култура“ се одржа на 6 и 7 април 2024 година. Дополнително, Викимедија МКД одржa уредувачки ден на тема „Роми“ на 9 април 2024 година. Овие активности се дел од широката глобална иницијатива и се спроведуваат во повеќе земји низ светот.

Крајниот исход на глобалната иницијатива Меѓународен ден на ромите 2024 е 18 нови статии од страна на 15 различни корисници на Википедија. Преку овие уредувачки активности, Викимедија МКД ја поддржува мултикултурната разновидност и ги засилува напорите за вклучување на ромската заедница во дигиталниот простор.

Со завршувањето на организациската и административна поставеност на Викимедија МКД, организацијата ги продолжува своите проекти и планирани настани зацртани со годишната програма. Меѓу многубројните проекти и активности од кои е составена програмата на Викимедија МКД, собранијата се исто така активности или настани кои ја трасираат иднината на здружението и развојот на заедницата.

На 30 март 2024 година Викимедија МКД го одржа своето прво собрание за 2024 година. Настанот беше организиран со почеток во 14:00 часот во ресторанот „Форца“ во Скопје.

Собранието на организацијата имаше за цел дискусија на неколку важни точки за иднината на Викимедија МКД. Главната цел за собирот беше развивање дискусија за иднината на здружението, идниот развој во однос на волонтерски корпус, програмски содржини и активности кои може да се вклопат во целите на здружението.

 

 

Покрај тоа, присутните членови на Викимедија МКД разговараа и за техничко-административни и организациски промени кои може да се очекуваат во блиската иднина.

Покрај овие точки, за време на собранието беа претставени и новите избрани членови на извршниот одбор на Викимедија МКД. Така збогатен со уште 4 нови членови, извршниот одбор заедно со сите волонтери, подржувачи и активисти на Викимедија МКД ќе се стремат кон поголеми успеси и достигнувања за општите цели на „Движењето Викимедија “ во  Македонија.