blog

Програмата ГЛАМ на Викимедија МКД во својата суштина е визија за зголемување на содржината на Википедија преку тесна соработка со институции како  галерии, библиотеки, архиви, и музеи. Ваквата соработка подразбира активности од различен вид, како што се работилници на зададена тема, обука на кадар од институциите за користење на Википедија, уредувачки сесии за збогатување на содржините на Википедија и нејзините сродни проекти, испраќање матичен Википедијанец кој би бил врска помеѓу институцијата и здружението и кој активно ќе ја подобрува содржината на Википедија и нејзините сродни проекти.

За таа цел Викимедија МКД постојано ја проширува својата мрежа на партерства и соработки. Организацијата има за цел да стапи во контакт и да оствари плодна соработка со голем број институции и организациски единици кои имаат волја и потенцијал да помогнат при креирањето на слободни соджини и да го направат пристапот до информации бесплатен за целата македонска читателска и образовно-научна јавност.

Најновата формализирана соработка доаѓа со Музејот на Македонија. На 02.04.2025 година, Викимедија МКД и Музејот на Македонија потпишаа Меморандум за соработка. Овој меморандум ги потврдува заложбите на двете организации да соработуваат заедно, а поконкретно Музејот на Македонија со својот потенцијал да помогне на Викимедија МКД при достигнување на своите зацртани цели – бесплатен пристап до слободни содржини и знаење. Преку културни, научни, историски, музејски и општествено-политички материјали, Музејот на Македонија ќе даде значајна помош и поддршка за остварување на целите на организацијата.

Директорот на Музејот на Македонија Борче Топуковски и извршниот директор на Викимедија МКД  Снежана Штрковска во просториите на Музејот на Македонија го потпишаа овој значаен документ за Викимедија МКД со што потенцијалите за делување на Викимедија МКД се значајно зголемени.

Со оваа соработка, Викимедија МКД и Музејот на Македонија воспоставуваат ново ниво на партнерство кое ќе придонесе кон збогатување на слободната енциклопедија и нејзините сродни проекти со квалитетна и проверена содржина. Овој чекор е само еден од многуте што Викимедија МКД ги презема во насока на отворање на знаењето за сите, со што се зајакнуваат културните и образовните капацитети во Македонија.

Со ова, Викимедија МКД продолжува со својата мисија да гради мостови меѓу институциите и заедницата, овозможувајќи знаењето да биде достапно за секого, во духот на слободниот и отворен пристап до информации.

Од 1 април па сѐ до 30 април 2025 се одржува уредувачкиот натпревар „СИЕ Пролет” проект на Викимедија МКД, Википедија на македонски јазик и сите заедници во Средна и Источна Европа, кое има за цел да помогне во подобрување на постоечките и создавање на нови статии на различни теми од сите држави во рамките на регионот Средна и Источна Европа (СИЕ).

Учесниците во рамките на натпреварот треба да уредуваат статии кои се предложени во рамките на наведените списоци на проектната страница по земја од регионите на Средна и Источна Европа. Темите се обемни и може да придонесете со тема што вам ви се допаѓа од географија, култура и историја па сѐ до музички традиции и етнографски обележја. Изборот на темата ваш, а придонесот од големо значење за Википедија на македонски јазик.

Сите статии треба да бидат напишани во склад со начелата и правилата на Википедија, па така сите статии треба да бидат напишани на енциклопедиски стил и да имаат извори. При уредување на натпреварот или по завршувањето на истиот, сите учесници треба да се запишат со кои статии учествувале. Во натпреварот имаат можност да учествуваат сите регистрирани корисници на Википедија на македонски јазик освен членовите на оценувачкиот одбор, а за најдобрите учесници се обезбедени награди.

Наградите за овој натпревар се предвидени да бидат вредносни купони за техничка стока и ваучери за книги. Наградите ќе бидат купени по завршувањето на уредувачкиот натпревар во вид на ваучери од продавница со седиште во Македонија. Наградите се следниве:

• Прва награда за најдобар уредник  – вредносен купон во висина од 10.000 денари.
• Втора награда за најдобар уредник  – вредносен купон во висина од 5.000 денари.
• Трета награда за најдобар уредник  – вредносен купон во висина од 3.000 денари.

Покрај овие три награди, овој уредувачки натпревар предвидува и:

• Награда за најдобра статија – вредносен купон во висина од 4.000 денари
• Награда најдобар постоечки учесник кој претходно не учествувал на уредувачките натпревари „СИЕ Пролет“ – вредносен купон во висина од 2.000 денари
• Награда за најмногу уредени статии од различни земји учеснички на натпреварот – вредносен купон во висина од 2.000 денари

За да може некој учесник да добие награда во некоја од категориите, мора да има напишано/подобрено најмалку 20 статии од списоците на другите учесници во натпреварот и истите да бидат оценети со просечна оценка од најмалку 2,0 од страна на членовите на оценувачкиот одбор).

Нови статии, нови содржини, нови награди. Пријавете се и учествувајте!

Ќе присуствувате на концерт, изложба или фестивал? Имате желба да споделите фотографии од настанот за едукативни и информативни цели? Тогаш проектот „Фотолов“ е токму за вас!

„Фотолов 2025“ е иницијатива наменета за поединци и групи кои сакаат да посетат некој настан или локација, со цел да создадат и објават фотографии под лиценца за слободна документација. Овие содржини ќе бидат достапни за користење на проектите на Викимедија, особено во статиите на Википедија на македонски јазик. Важно е фотографиите да имаат точни описи и да бидат употребливи за енциклопедиски цели.

Секој кој е заинтересиран да спроведе фотолов потребно е да поднесе предлог во полето „Назив на предлогот“ или со пополнување на следниот Формулар за пријавување. Предложувачот треба јасно да ги претстави своите планови, образложувајќи кој настан ќе го фотографира, со кое превозно средство ќе патува (доколку е ова важно), колку време ќе трае потфатот (дали е еднодневен и неколкучасовен настан или трае повеќе дена), колку членови ќе учествуваат во екипата (ако ги има) и колкави се проценетите трошоци. Заинтересираниот поединец или група ќе треба да ја најави својата намера за одење на фотолов најмалку 7 дена пред тргнувањето. Врз основа на содржината на барањето, заедницата ќе донесе одлука за тоа дали предлогот треба да биде одобрен. Сите фотографски материјали под лиценца за слободна документација да бидат подигнати на Заедничката ризница.

Право на надомест за направените трошоци за време на фотоловот има секој предлагач на фотолов одобрен од страна на заедницата на Википедија на македонски јазик. Трошоците што подлежат на надомест вклучуваат: патни трошоци, трошоци за локален превоз, трошоци за храна и пијалаци доколку е настан што трае повеќе дена, и трошоци за влезници, сето ова во висина до 4.000 денари, под услов да има подигнато најмалку 30 фотографски записи и да се приложат соодветни докази за трошоци.

Преку „Фотолов“, Викимедија МКД ви нуди можност да уживате во фотографирање на културни и јавни настани, додека истовремено придонесувате за слободното знаење!

Викимедија МКД континуирано организира уредувачки маратони со цел да ја збогати Википедија на македонски јазик со квалитетни и достапни информации. Преку овие настани, волонтерите и членовите на Вики Клубовите активно придонесуваат кон слободното знаење, обработувајќи различни теми од културата, историјата, географијата и многу други области.

Овој пат со цел да се збогати Википедија на македонски јазик со квалитетни содржини за Словенија, оваа година се организираше едномесечниот уредувачки предизвик „Запознајте ја Словенија“. Овој возбудлив проект им овозможи на членовите на Вики Клубовите во Македонија да дадат свој придонес кон збогатување на слободното знаење, истовремено запознавајќи се со богатата историја, култура и географија на Словенија.

Уредувачкиот маратон „Запознајте ја Словенија“ се одржуваше од 1 февруари 2025 до 28 февруари 2025. Проектот беше во организација на Здружението Викимедија МКД во соработка со Словенечки центар – Скопје, поддржан од Амбасадата на Словенија во Скопје. Главната цел беше да се намали недостатокот на содржини поврзани со Словенија на Википедија на македонски јазик. Сите членови на Вики Клубовите во Македонија, беа добредојдени да учествуваат и да го дадат својот придонес кон збогатување на Википедија на македонски јазик.

Учеството во уредувачкиот маратон беше едноставно и имаше само неколку основни правила:

Учесникот мораше да биде член на некој од Вики Клубовите во Македонија.

Напишаната статија мораше да биде на тема поврзана со Словенија.

Статијата мораше да биде нова.

За најдобрите пет учесници беа предвидени специјални награди и дипломи, кои ќе бидат доделени во текот на месец април на свечен настан во Скопје. Наградите ги обезбедуваат Словенечкиот Центар во соработка со Амбасадата на Словенија во Скопје. Па така со гордост ги објавуваме добитниците на награди:

1. Горазд Војнески со освоени 673 поени
2. Emilija Dobreva со освоени 577 поени
3. Mito999 со освоени 203 поени
4. Марко09 со освоени 113 поени
5. Михаил Милевски со освоени 108,5 поени

Вкупно учествуваа 50 корисници и беа напишани 645 статии.

Овој успешен уредувачки маратон не само што ја збогати Википедија со вредни информации за Словенија, туку и ги мотивираше членовите на Вики клубовите да продолжат со нивниот придонес кон слободното знаење. Благодарение на нивниот труд, Википедија на македонски јазик стана побогата со нови и квалитетни содржини.

Промовирањето на еднаквоста помеѓу луѓето – без разлика на нивниот пол, возраст, етничка припадност или јазик – претставува еден од највисоките приоритети на организацијата при нејзиното делување. Викимедија МКД доследно се залага за намалување на родовиот јаз во содржините на Википедија и нејзините проекти, што претставува цел кон која тежнееме и ја исполнуваме од година во година.

Во духот на оваа заложба, по повод Меѓународниот ден на жената – 8 Март, Викимедија МКД организираше уредувачки маратон, со што на достојно ниво се одбележа овој значаен ден за жените во нашата земја и ширум светот. Овогодинашниот уредувачки маратон се одржа на 6 март 2025 година, со активна вклученост и заеднички напори на македонската вики-заедница. Темата на овогодинашниот осмомартовски маратон беше „Жените на Македонскиот фронт“, посветена на жените кои одиграле значајна улога во македонската историја.

На настанот учествуваа 12 членови на Вики клубот од гимназијата „Јосип Броз-Тито“ – Скопје, кои, под менторство на професорката по историја Ирена Трајковска Стејровска, дојдоа во Музејот на македонската борба. Едукаторката Ана Вишинова одржа предавање за значајните жени во македонската историја. Предавањето, послужи како инспирација за учесниците, по што следеше заедничко уредување на статии поврзани со темата.

Крајниот резултат на овој уредувачки маратон е 10 новосоздадени статии на Википедија.

Ова претставува уште еден значаен чекор кон збогатување на слободното знаење и зголемување на видливоста на жените во историјата.

Дел од атмосферата од настанот може да ја проследите преку фотографски материјал достапен на следнава врска.

Нека е среќен 8 Март – Меѓународниот ден на жената!

Во современото општество, информираноста и достапноста на точни информации играат клучна улога во подобрувањето на животот на многу луѓе. Една од областите каде што знаењето може да направи голема разлика е подигнувањето на свесноста за ретките болести.

Токму во оваа мисија, веќе седум години по ред, Вики клуб Охрид и Викимедија МКД активно соработуваат со Здружението за ретки болести од Охрид, предводено од Гордана Лолеска. Оваа значајна соработка започна на иницијатива на координаторот на Вики клуб Охрид, Наташа Неданоска, под мотото „За да не се ретки оние кои знаат за ретки“. Целта е јасна – преку создавање и објавување на едукативни содржини, да се поттикне јавната свест и да се овозможи полесен пристап до информации за ретките болести.

Февруари – месецот на ретките болести Февруари е симболично поврзан со ретките болести поради неговата специфична должина од 28 или 29 дена. Во овој месец, Здружението за ретки болести од Охрид организира бројни активности, вклучувајќи едукативни прилози подготвени од експерти од различни области. Овие прилози се емитуваат и објавуваат на локалните медиуми, а Вики клуб Охрид активно се вклучува во дигиталната едукација преку објавување на статии за ретки болести на Википедија на македонски јазик. Со оваа иницијатива, секојдневно во текот на февруари се збогатува Википедија на македонски јазик со нови, рецензирани информации за ретките болести, кои потоа се користат како извор и во други медиуми.

Наставничката и координаторка на Вики клуб Охрид, Наташа Неданоска, гордо истакнува: „Во изминатите седум години, објавивме повеќе од 200 статии за различни ретки болести на Википедија на македонски јазик. Нашата цел беше не само да дадеме поддршка и придонес, туку и да создадеме трајна вредност на најголемата електронска енциклопедија. Особено сум горда што низ годините наназад, во оваа иницијатива се вклучија и волонтерите на Вики клуб Охрид, кои несебично го посветија своето време за оваа благородна кауза.”

Оваа соработка е пример за тоа како знаењето може да биде моќна алатка во борбата за видливост на ретките болести. Со секоја нова статија на Википедија, со секој споделен податок и секој вклучен волонтер, се прави чекор кон поголема информираност, разбирање и поддршка за луѓето кои живеат со ретки болести. Вики клуб Охрид и Викимедија МКД продолжуваат со својата мисија – за да не бидат ретки оние кои знаат за ретките.

Викимедија МКД постојано работи на промоција и развој на Википедија на македонски јазик, настојувајќи да обучи што поголем број луѓе во процесот на уредување и создавање слободни образовни содржини. Освен што се посветува на збогатување на самата енциклопедија, организацијата активно вложува во градење на волонтерска заедница која ќе придонесе за одржливост и натамошен развој на Википедија на македонски јазик. Една од клучните активности во овој процес се конференциите за наставници, преку кои просветните работници добиваат насоки за користење на Википедија во наставата и нејзина примена како едукативна алатка.

Па така, на 27 февруари 2025 година Викимедија МКД одржа конференција за наставници во СУГС „Кочо Рацин“ во Скопје. Оваа конференција беше посетена од 15 учесници, наставен кадар на училиштето кој пројави силна желба за користење на Википедија, како средство за наставни цели, така и како место каде се создаваат нови слободни содржини. Конференцијата започна во 12 часот и 30 минути во просториите на училиштето.

Најпрво се обрати Снежана Штрковска, извршен директор на Викимедија МКД  која ги запозна учесниците за самата енциклопедија, како функционира Википедија, кои се придобивките од употребата на Википедија како наставно средство и како правилно да се користи Википедија како информативен извор за точни и потврдени информации. По неа се обрати Боса Филиповиќ, менаџер за образовна програма на Викимедија МКД која која детално ги објасни најчестите грешки што се прават при уредувањето и ги презентираше основните принципи на Википедија.  На самиот крај се обрати  Ирена Трајковска Стерјовска која  ги запозна учесниците со својата работа и за достигнувањето на вики клубот која го води таа, а функционира во рамките на здружението.

Конференцијата помина во пријатна и работна атмосфера. Учесниците беа заинтересирани за начинот на работа на Википедија, но и можностите кои постојат за употреба на енциклопедијата како едно од наставните средства во образовниот процес во Македонија.

Овој настан претставува само еден дел од заложбите на Викимедија МКД за развој на слободното знаење. Организацијата продолжува со планирање нови едукативни активности и соработки со образовни институции, со цел Википедија да стане уште подостапна и поприменлива во образованието. Преку вакви иницијативи, не само што се поттикнува критичко размислување и дигитална писменост, туку се создава и нова генерација на уредници кои ќе придонесат за збогатување на Википедија на македонски јазик.

Дел од атмосферата ви ја доловуваме преку фотографски материјал кој може да се погледне на следнава врска.

Викимедија МКД продолжува со својата мисија за едукација и ангажирање на младите преку иновативната образовна програма. Главен фокус на програмата се младите генерации, со цел да се поттикне нивната љубов кон знаењето и слободната енциклопедија, Википедија. Исто така со обуките за ученици, Викимедија МКД има за цел да ги инспирира младите генерации да го прифатат концептот на слободно знаење и да станат активни учесници во создавањето на содржини достапни за сите.

На 26 февруари 2025 година во просториите на Викимедија МКД во МКЦ беше одржана уште една успешна обука за ученици. На обуката учествуваа 11 ученици од  СЕПУГС „Васил Антевски – Дрен“ под раководство на координаторката Лилјана Стојковска.

Првиот дел од настанот говор одржа Боса Филиповиќ, менаџер за образовна програма на Викимедија МКД  која ги запозна учениците за самата енциклопедија, како функционира Википедија,  како правилно да се користи Википедија како информативен извор за точни и потврдени информации, најчестите грешки што се прават при уредувањето и исто така ги презентираше основните принципи на Википедија.

По предавањето следуваше заедничко уредување на тема „Запознајте ја Словенија“ , која е тема на моменталниот уредувачки маратон за членовите на Вики Клубовите во Македонија, што се одржува од 1 февруари 2025 до 28 февруари 2025, а е во организација на Здружението Викимедија МКД во соработка со Словенечкиот центар – Скопје, поддржан од Амбасадата на Словенија во Скопје.

Учесниците, потпомогнати од организаторите, уредуваа, подобруваа и објавуваа статии на Википедија на македонски јазик. Вкупно беа напишани 21 статија.

Преку фотографскиот материјал ви прикажуваме дел од атмосферата на овој настан.

Википедија на македонски јазик, најголемата слободна енциклопедија на македонски јазик, го достигна значајниот праг од 150.000 статии! Овој успех е резултат на посветената работа на македонските уредници, волонтери и ентузијасти кои континуирано придонесуваат за развојот на оваа дигитална ризница на знаење.

Википедија на македонски јазик е основана во септември 2003 година и во изминатите две децении постојано расте, станувајќи еден од главните извори на информации на македонски јазик. Од своите почетоци, со само неколку статии, денес оваа платформа нуди обемна база на податоци која опфаќа најразлични теми – од историја, географија, наука, уметност, култура, па сè до современи настани и технолошки достигнувања.

За да стигне до 150.000 статии, Википедија на македонски јазик помина низ различни фази на развој. Со текот на годините, таа добиваше сè поголем број активни уредници кои несебично ја збогатуваат со нови информации. Од воведување на нови технички алатки за уредување, до подобрување на квалитетот и точноста на содржината, Википедија на македонски јазик стана платформа од огромно значење за македонскиот јазик и култура.

Во ера на дигитализација, пристапот до релевантни и точни информации на македонски јазик е клучен. Википедија овозможува слободен пристап до знаење за секого, без оглед на возраста, локацијата или образованието. Со тоа, таа игра важна улога во образованието, научните истражувања, новинарството и секојдневното информирање на македонските граѓани. Исто така, Википедија на македонски јазик придонесува за зачувување и промовирање на македонскиот јазик во дигиталниот простор. Преку статии за историјата, јазикот, културата и обичаите на Македонија, оваа енциклопедија служи како дигитална архива на националното наследство.

Со 150.000 статии зад себе, Википедија на македонски јазик не застанува тука. Предизвикот сега е да се подобри квалитетот на постоечките статии, да се збогати содржината со релевантни извори, фотографии и мултимедијални материјали, како и да се привлечат нови уредници кои ќе помогнат во нејзиниот понатамошен развој. Секој поединец може да стане дел од овој проект – Википедија е отворена за сите кои сакаат да придонесат кон глобалната заедница на знаење. Со поголема ангажираност од образовните институции, медиумите и истражувачките центри, македонската Википедија може да продолжи да расте и да стане уште поквалитетен извор на информации.

Достигнувањето на 150.000 статии е голем успех за Википедија на македонски јазик, но и за македонското дигитално општество во целина. Оваа платформа претставува доказ дека македонскиот јазик има свое значајно место во светската мрежа на информации. Со постојан труд, посветеност и ентузијазам, Википедија на македонски јазик ќе продолжи да се развива и да биде скапоцен извор на знаење за сегашните и идните генерации.

Википедија, најголемата слободна енциклопедија на интернет, постои благодарение на илјадници волонтери кои ја уредуваат и надополнуваат со нови информации секојдневно. За да се поттикне учеството на нови уредници и да се развива културата на слободно знаење, постојат Вики клубовите каде групи на ентузијасти заеднички учат, истражуваат и придонесуваат кон подобрување на содржините на Википедија.

Во Македонија, Вики клубовите играат важна улога во збогатувањето на Википедија на македонски јазик со нови, квалитетни и веродостојни статии. Еден од најактивните клубови е Вики клубот во Велес, кој со години служи како центар за младите кои сакаат да научат како да уредуваат на Википедија и како нивниот труд може да придонесе за пошироката заедница.

На 20 февруари 2025 година, Вики клубот во Велес го прослави својот петти роденден со свечена прослава што се одржа во Медиотеката на Градската библиотека „Гоце Делчев“. Настанот започна во 14 часот и присуствуваа 20 учесници, меѓу кои членови на клубот, поддржувачи, пријатели и гости кои го следат развојот на клубот од неговото основање.

Свеченоста ја отвори Снежана Штрковска, извршен директор на Викимедија МКД, која зборуваше за значењето на Вики клубовите во развојот на слободното знаење во Македонија. Таа истакна дека овие клубови не само што помагаат во збогатување на Википедија туку и го поттикнуваат критичко размислување, истражувачки дух и тимска работа. По неа, зборуваше Лили Арсова, координатор на Вики клубот во Велес, која воедно и беше организатор на настанот и направи краток преглед на историјатот на клубот, неговите активности и постигнати успеси. Таа нагласи дека клубот низ годините успеал да внесе голем број нови членови, кои со своите уредувања значително ја збогатија Википедија на македонски јазик. Покрај тоа, напомена дека клубот организирал бројни работилници, натпревари и едукативни настани кои придонеле за развојот на дигиталната писменост кај младите.

Еден од најсвечените моменти на прославата беше секако роденденската торта, симбол на посветеноста и ентузијазмот на членовите на клубот. Во пријатна атмосфера, присутните имаа можност да се потсетат на изминатите успеси и да разменат идеи за идни проекти и активности.

Петгодишнината на Вики клубот во Велес не е само повод за славење, туку и можност за рефлексија и поставување нови цели. Во иднина, клубот ќе продолжи да работи на проширување на своето членство, организирање едукативни настани и мотивирање на што повеќе луѓе да станат дел од глобалното движење за слободно знаење. Со досегашните резултати и посветеноста на членовите, Вики клубот во Велес е пример за успешен проект кој покажува како волонтерската работа и љубовта кон знаењето можат да донесат позитивни промени во општеството.

Фотографскиот материјал од настанот може да го погледнете на следнава врска.