На 21 октомври 2026 година, со почеток во 13 часот, во Музејот на македонската борба во Скопје, Викимедија МКД свечено одбележа 10 години од постоењето на вики клубовите во Македонија. Овој значаен јубилеј претставува важна пресвртница во развојот на образовните активности на организацијата, кои во изминатата деценија овозможија голем број ученици да се запознаат со Википедија, да стекнат нови знаења и вештини и активно да придонесуваат кон создавањето слободни содржини на македонски јазик.
Свеченото одбележување беше посветено на десетгодишниот развој на вики-клубовите, нивните постигнувања и придонесот во ширењето на слободното знаење меѓу младите. Настанот претставуваше можност да се направи осврт на досегашните активности, реализираните проекти и успешната соработка со образовните установи низ Македонија. Воедно, беше истакнато значењето на континуираната работа со учениците и наставниците, благодарение на која вики клубовите станаа препознатлив дел од образовната програма на Викимедија МКД.
На присутните им се обрати Снежана Штрковска, извршен директор на Викимедија МКД, која го истакна значењето на вики клубовите за развојот на организацијата и нивната улога во поттикнувањето на младите да станат активни создавачи на слободно знаење. Таа се осврна на досегашните успеси и на важноста од продолжување на активностите насочени кон вклучување нови генерации ученици. Посебно беше нагласена улогата на вики-клубовите во создавањето заедница на млади уредници, кои преку своите придонеси помагаат во збогатувањето на Википедија на македонски јазик.
Свое обраќање имаше и Боса Филиповиќ, менаџер за образовната програма на Викимедија МКД, која зборуваше за развојот на вики клубовите во изминатите десет години, нивното функционирање и значењето на соработката со училиштата. Посебно внимание беше посветено на придобивките што учениците ги стекнуваат преку учеството во вики-клубовите, како и на можностите за нивно понатамошно вклучување во активностите на организацијата. Таа се осврна и на значењето на практичната работа, преку која учениците постепено ги совладуваат основните правила и начини на уредување на Википедија, стекнувајќи искуство што можат да го применуваат и во своето понатамошно образование.
На свеченоста свое обраќање имаше и Ана Вишинова од Музејот на македонската борба, која има значајна улога во остварувањето и развивањето на соработката меѓу музејот и Викимедија МКД. Таа се осврна на досегашната успешна соработка, заедничките активности и значењето на поврзувањето на културните институции со проектите на Викимедија. Преку оваа соработка се создаваат можности за промовирање на културното и историското наследство и негово доближување до пошироката јавност преку слободното знаење. Пред присутните се обрати и директорката на Музејот на македонската борба, Анче Илиева, како и Даниела Митевска од музејот, кои исто така го истакнаа значењето на ваквите иницијативи и заеднички активности.
Во текот на свеченоста свои обраќања имаа и претставниците и координаторите на вики клубовите од различни градови и училишта низ Македонија. Меѓу нив беа Лили Арсова од вики клубот во Велес, Александра Шундевски од вики клубот во Демир Хисар, Валентина Трајковка, член на Извршниот одбор на Викимедија МКД, Наташа Старделова, координаторка на вики клубот во ООУ „Св. Климент Охридски“ – Драчево, Лилјана Стојковска од вики клубот при СЕПУГС „Васил Антевски – Дрен“, Јованка Шалева од вики клубот во Штип и Ирена Трајовска Стерјовска од вики клубот при СУГС „Јосип Броз Тито“ – Скопје. Тие ги споделија своите искуства од работата со учениците, постигнатите резултати и значењето на вики клубовите во поттикнувањето на младите активно да придонесуваат кон збогатувањето на Википедија на македонски јазик.
Преку нивните обраќања беше претставена и практичната страна на функционирањето на вики клубовите, од организирањето на редовните средби и изборот на теми за уредување, до непосредната работа со учениците и следењето на нивниот напредок. Беше истакната важноста на улогата што ја имаат координаторите во мотивирањето на учениците, поттикнувањето на нивната љубопитност и создавањето позитивна средина во која можат да ги развиваат своите способности. Нивните искуства претставуваат значаен показател за тоа како вики-клубовите придонесуваат за поврзување на образованието со современите дигитални можности.
Во текот на изминатата деценија, вики-клубовите прераснаа во значаен дел од образовните активности на Викимедија МКД. Преку редовни средби, обуки и уредувачки активности, учениците имаа можност да научат како се создаваат и уредуваат статии на Википедија, истовремено развивајќи ги своите дигитални и јазични вештини. Нивниот придонес се огледува во бројните новосоздадени и подобрени статии, со кои се збогатува македонското издание на Википедија.
Покрај создавањето енциклопедиски содржини, вики клубовите имаат важна улога и во поттикнувањето на тимската работа, меѓусебната соработка и размената на знаења меѓу учениците. Учеството во нивните активности им овозможува на младите да стекнат поголема самостојност при користењето дигитални алатки, да ја развиваат својата креативност и да ја препознаат вредноста на споделувањето знаење со пошироката јавност. На овој начин, вики клубовите претставуваат простор во кој образованието, технологијата и волонтерскиот придонес се поврзуваат во заедничка цел.
Одбележувањето на десетгодишниот јубилеј претставуваше и можност да се изрази благодарност до сите координатори, наставници, ученици и соработници кои низ годините придонесоа за успешното функционирање и развој на вики-клубовите. Нивната посветеност и континуирана работа се важен дел од постигнатите резултати. Особено значајна е поддршката од образовните установи, кои преку соработката со Викимедија МКД овозможуваат учениците да се запознаат со нови начини на учење и активно да учествуваат во создавањето слободни образовни содржини.
Десетгодишното постоење на вики-клубовите сведочи за успешноста на една идеја која низ годините се развиваше и надградуваше, поврзувајќи ученици, наставници и волонтери со заедничка желба за ширење на слободното знаење. Постигнатите резултати претставуваат основа за понатамошно унапредување на образовната програма, проширување на соработката со училиштата и создавање нови можности за учество на младите во викимедиските проекти.
Со одбележувањето на 10 години од постоењето на вики клубовите во Македонија, Викимедија МКД ја потврдува својата посветеност на образованието, слободното знаење и вклучувањето на младите во википедијанското движење. Овој јубилеј не претставува само осврт на изминатата деценија, туку и поттик за нови активности, соработки и успеси во годините што следуваат, со цел уште поголем број ученици да станат дел од заедницата која придонесува за развојот на Википедија на македонски јазик.
Фотографскиот материјал од прославата може да го погледнете на следнава врска.