blog

На 15 јануари, во чест на роденденот на Википедија, македонската вики-заедница организираше специјална прослава. Настанот се одржа во пријатната атмосфера на кафулето „Пјаца Либерта“ во Скопје, со почеток во 17 часот. Оваа средба беше можност да се одбележи 24-годишнината од основањето на Википедија, еден од најголемите и највлијателни проекти на отворено знаење во светот.

На прославата присуствуваа активни вики-уредници, поддржувачи и љубители на слободното знаење, кои заеднички го одбележаа значењето на оваа глобална платформа за размена на информации. Настанот започна со неформални разговори, каде присутните имаа можност да споделат свои искуства, успеси и предизвици со уредувањето на статиите на Википедија.

Еден од најважните моменти на вечерта беше доделувањето на статуетки за траен придонес на двајца истакнати википедијанци. Овие статуетки се доделуваат како признание за уредувачи кои активно работат на Википедија повеќе од 10 години и имаат над 10.000 уредувања. Признанијата беа дочекани со големи аплаузи, како потврда за нивната неуморна работа и посветеност на слободното знаење.

Дружењето продолжи во опуштена атмосфера со вкусни закуски и пијалаци. Учесниците ја искористија можноста за неформално вмрежување, размена на идеи и планови за идни активности на заедницата. Радоста и ентузијазмот беа присутни кај сите, што уште еднаш ја потврди посветеноста на македонската вики-заедница кон унапредување на слободното знаење.

Покрај пригодните закуски и пијалaци, неминовна за овој настан беше и роденденската торта. Специјално подготвена за оваа пригода, тортата беше во централниот фокус на настанот со што и официјално се прославија 24 години дружење со Википедија.

Покрај самиот настан и преувкусната торта, Википедија доби и свои подароци. На самиот ден на роденденот, на 15 јануари 2025 година, Викимедија МКД објави повик да сите корисници на Википедија да објават статии, нови или подобрени, како роденденски подарок за Википедија. Повикот траеше преку целиот ден, и беа објавени 33 нови статии и 19 Википедијанци дадоа свој подарок на Википедија и ја подобрија содржината на енциклопедијата.

Оваа прослава беше уште еден доказ дека Википедија не е само платформа, туку вистинска заедница на луѓе кои веруваат во моќта на знаењето. Настанот заврши со ветување дека ќе се продолжи со уште поголема енергија во 2025 година.

Целиот фотографски материјал од настанот може да го погледнете тука.

Веродостојноста на изворите и создавање на статии и содржини на Википедија кои се соодветно поткрепени со релевантни извори е една од главните цели на корисниците кои ја прават Википедија тоа што е денес. Поради тоа, Вики-заедницата неуморно работи и посветува огромно внимание за создавање на неутрална и добро цитирана енциклопедија. Како резултат на тоа и оваа година Викимедија МКД е дел од меѓународната иницијатива именувана како #1Lib1Ref.

Оваа меѓународна иницијатива во облик на натпревар има за цел да ја подобри цитираноста на Википедија и создавање на поквалитетна и поверодостојна енциклопедија. Овој натпревар се организира на локално ниво, односно на Википедија на македонски јазик, но и на регионално, односно во регионот на Средна и Источна Европа.

Заинтересираните уредници може да учествуваат на овој повик и да ја подобрат содржината на Википедија која нема или има мал број на наводи. Натпреварот се одржува од 15 јануари 2025 до 05 февруари 2025 година.

Натпреварот има предвидено и соодветни награди за уредниците кои ќе го исполнат критериумот и соодветно ќе зачуваат уредувањето, односно:

• За да се освои награда, потребно е да се наведат најмалку 100 веродостојни извори во најмалку 50 различни статии, и
• Во описот на измената задолжително да се внесе #1Lib1Ref и #1Lib1RefCEE.

Наградите кои се предвидени за овој натпревар се:

• Прва награда: купон во вредност од 6.000 денари.
• Втора награда: купон во вредност од 4.000 денари.
• Трета награда: купон во вредност од 2.000 денари.

Покрај овие награди предвидени се и регионални награди.

Најдете извор, вметнете го во статијата и зачувајте! Можеби сте вие еден од потенцијалните добитници на награда.

Викимедија МКД, како невладина организација врши промоција и поддршка на Википедија и другите сродни проекти. Нашата  креативна заедница има за цел да ја рашири базата на знаења и да ја олесни достапноста до информации за сите.

Викимедија МКД е огранок на Фондацијата Викимедија, фондација која промовира слободно знаење и слободен пристап до информации, воглавно преку Википедија и нејзините сродни проекти.

Поради обемот на работа и зголемен број проекти за 2025, Викимедија МКД отвора eдна нова работна позиција, за која ве охрабруваме да се пријавите. Имено, се објавува следниов оглас за работа:

Координатор за соработка со културни институции

Дали сте заинтересирани за културното наследство, технологијата и отвореното знаење? Придружете ни се како координатор на програмата ГЛАМ (соработка со галерии, библиотеки, архиви, музеи и сродни институции), и помогнете да се премости јазот помеѓу културните институции и глобалната заедница на Википедија!

Потребни квалификации:

• Најмалку ВСС VII/1 степен (или најмалку 240 кредити според ЕКТС)
• Одлично познавање на англиски јазик (пишување и зборување)
• Има силни организациски и комуникациски вештини
• Познавање на работа со скенер, дигитализација и поставување медиуми на интернет
• Предходно искуство со проекти на Викимедија или културни институции се смета за предност.
• Познавање на работа со Википедија се смета за предност
• Работно искуство од најмалку 2 години во невладин сектор се смета за предност
• Поседува лаптоп за проектна работа.

Работно време:

Работното време е 6 часа дневно, од кои 4 платени и 2 волонтерски часа, но доколку проектите го бараат тоа, може да биде и попладневно или за време на викенди.

Одговорности и задачи:

• Водење на активностите, настаните и обврските што Здружението ги има со културните ГЛАМ институции,
• Соработка со галерии, библиотеки, архиви и музеи (ГЛАМ) за да се промовира отворен пристап до материјали од културата
• Организирање работилници, обуки и настани со културните институции
• Создавање, уредување и подобрување на содржината на Википедија
• Скенирње и поставување фотографии, документи и други материјали за проекти на Википедија.
• Соработка со матичните Википедијанци, и други видови уредувања во кои се повикува заедницата да учествува
• Помагање на менаџерот за образование, менаџерот на заедница и менаџерот за маркетинг и комуникации, и/или другите членови при изведување на настани и проекти.

Ние нудиме:

• • Платена обука, и потоа вработување;
  • Интересна и исполнета седмица, соработка со различни профили на луѓе;
  • Можност за работа со водечки културни институции;
  • Шанса да се придонесе за отворено знаење и зачувување на културата;
  • Патувања.

Сите заинтересирани можат да испратат кратка биографија, мотивационо писмо и фотографија на kontakt@wikimedia.mk.

Уредувачките денови и викенди претставуваат значајна иницијатива за збогатување на содржините на Википедија на македонски јазик, која годинава успеа да привлече голем број волонтери од различни профили. Овие настани имаат за цел не само да овозможат создавање и унапредување на статии, туку и да го поттикнат колективниот дух и соработката во градењето на најголемата онлајн енциклопедија достапна на нашиот јазик.

Со редовен распоред – секој вторник и четврток за уредувачките денови и за време на викендите за уредувачките викенди – учесниците имаа можност да пишуваат статии на најразлични теми. Беа предвидени награди за најплодотворни учесници кои имаат највисок успех при заедничкото и споено бодување од уредувачките денови и уредувачките викенди. Наградите се во облик на вредносни купони за книги или техничка опрема, а за да се освоеше било која награда, потребно беше да се исполнат следните критериуми:

• да се учествува во најмалку 100 изданија на уредувачките денови и/или викенди;
• да се учествува во барем 10 од 12-те календарски месеци; и
• да се создадат или подобрат најмалку 150 статии, предлошки или модули.

Така со гордост ги објавуваме резултатите и добитниците на награди:

• Прва награда: Lili Arsova – купон во вредност од 15.000 денари.
• Втора награда: P.Nedelkovski– купон во вредност од 9.000 денари.

На уредувачките денови и викенди во 2024 учествуваа вкупно 28 уредници и беа напишани и подобрени вкупно 1218 статии. Со доделувањето на овие награди, ја заокружуваме успешната 2024 година и ги охрабруваме сите стари и нови уредувачи на Википедија да се приклучат во следните изданија. Уредувачките денови и викенди за 2025 година веќе започнаа – ова е вашата можност да се вклучите, да придонесете и да станете дел од глобалната заедница на Википедија. Честитки за добитниците на награди и благодарност за сите учесници! Бидете дел од создавањето на знаење! Бидете дел од Википедија!

Уредувачките маратони кои ги организира Викимедија МКД, покрај тоа што даваат можност да се придонесе за достапноста на енциклопедиски информации на македонски јазик, даваат и различни можности за добивање награди на учесниците кои пишуваат статии. Викимедија МКД го препознава значењето на добро структурираните и прецизно уредени статии, затоа и оваа година организираше уредувачки натпревар за средување на статии кој се одржуваше од 4 ноември до 3 декември 2024 година.

Овој натпревар имаше за цел да поттикне уредување и подобрување на постоечките статии на Википедија на македонски јазик, со што енциклопедијата станува уште покорисна и поквалитетна за користење. Натпреварот беше насочен кон средување на статии кои се обележани со предлошките {{Внимание}}, {{Викификација}} и {{Без извори}}, како и кон решавање на проблемите со прикажувањето на параметрите во статиите.

Сите регистрирани искусни корисници на Википедија на македонски јазик, освен членовите на оценувачкиот одбор, можеа да учествуваат доколку ги исполнуваа следните два критериума:

1. Имаа направено најмалку 5.000 уредувања до почетокот на натпреварот,
2. Поминати беа најмалку пет години од нивното прво уредување на Википедија на македонски јазик.

Статиите ги прегледуваше жири, кое беше составено од тројца википедијанци. Членовите на оценувачкиот одбор ги прегледаа сите статии и секоја ја бодуваа поединечно со бодови од 1 до 10. Жирито ја донесе конечната одлука за победникот:

• I награда: Тиверополник– вредносен купон од 12.000 денари
• II награда: вредносен купон од 6.000 денари – не е доделена
• III награда: вредносен купон од 3.000 денари- не е доделена

Дополнителни награди беа предвидени за:

• Најдобра статија: Тиверополник со статијата „Историја на Индија”– вредносен купон од 5.000 денари
• Најдобар нов учесник: вредносен купон од 2.000 денари- не е доделена

На уредувачкиот натпревар учествуваа 3 корисници и беа средени 114 статии. Честитки за вредните учесници.

Википедија е глобална платформа која претставува еден од најголемите и најдоверливите извори на информации на интернет. Нејзината моќ лежи во заедничката работа на илјадници волонтери ширум светот, кои секојдневно придонесуваат за збогатување на оваа огромна база на знаење. Википедија на македонски јазик, како дел од оваа иницијатива, игра значајна улога во зачувувањето и ширењето на знаењето за македонската култура, историја, јазик и општествени процеси.

Во текот на 2024 година, Википедија на македонски јазик привлече значителна читаност благодарение на различни теми од интерес за јавноста. Меѓу нив, една статија се издвои како најчитана и најпосетувана – „Македонски претседателски избори (2024)“. Оваа статија стана централна точка за информирање на граѓаните за претседателските избори кои беа значајни за политичката иднина на земјата.

Зошто токму претседателските избори? Статијата „Македонски претседателски избори (2024)“ ја опфаќа целокупната динамика на изборниот процес, од објавувањето на кандидатурите, преку политичките програми и предизборните кампањи, па до анализата на резултатите и нивното влијание. Оваа содржина привлече илјадници читатели, кои во текот на годината бараа релевантни информации за случувањата поврзани со изборите.

Втора најчитана статија за изминатава 2024 година беше „Македонски парламентарни избори (2024)“. Популарноста на овиe статии ја истакнува важноста на Википедија како платформа за информирање. Читателите имаа можност да ја следат, не само официјалната изборна хронологија, туку и перспективите на заедницата, која преку уредувањето на статиите придонесе за нејзиното збогатување со нови податоци и аналитички увиди. Успехот на овие статии е доказ за тоа како Википедија успева да се прилагоди на потребите на своите корисници, овозможувајќи им пристап до ажурирани, проверени и релевантни информации. Таа не е само архивски извор, туку и динамична платформа која се гради и развива според потребите на времето и интересите на заедницата.

Трета најчитана статија за 2024 година беше статијата „Македонија“. Оваа статија редовно се наоѓа меѓу првите 5 најчитани статии секоја година.

Ако погледнеме по месеци кои се најчитани статии, тоа изгледа вака:

• Јануари – Водици
• Февруари – Балканска приказна (ТВ-серија)
• Март – Македонски претседателски избори (2024)
• Април – Македонски претседателски избори (2024)
• Мај – Македонски парламентарни избори (2024)
• Јуни – Македонија
• Јули – Влада на Македонија
• Август – Успение на Пресвета Богородица
• Септември – Ден на независноста на Македонија
• Октомври – Ден на востанието на Македонија
• Ноември – Македонија
• Декември – Свети Климент Охридски

Најчитаната статија на Википедија на македонски јазик за 2024 година, „Македонски претседателски избори (2024)“, ја истакнува улогата на Википедија како клучен извор на информации за јавноста. Овој успех покажува дека кога заедницата заеднички придонесува, резултатот е платформа која не само што информира, туку и инспирира.

Викимедија МКД останува посветена на својата мисија – да обезбеди бесплатен, лесен и достапен пристап до квалитетни информации за сите. Преку заедничкиот труд на уредувачите, Википедија на македонски јазик се развива како динамична платформа која одговара на интересите и потребите на јавноста и продолжува да биде симбол на заедничката посветеност кон слободниот пристап до знаење, што ја прави непроценлив дел од нашето дигитално секојдневие. Успесите во 2024 година се само потсетник дека знаењето е најсилната алатка за поврзување на луѓето, зачувување на културата и унапредување на заедницата. Со надеж за уште поголем раст и влијание, Википедија продолжува да биде светилник на слободното знаење за идните генерации.

Уредувачките денови и викенди продолжуваат и оваа година, носејќи уште поголеми можности за заедничко создавање содржини на македонски јазик. Ако сакате да бидете дел од глобалната заедница која го гради најголемиот извор на знаење достапен на македонски јазик, ова е вистинскиот момент да се вклучите! Вашето учество не само што ќе придонесе кон зголемување на достапните информации на Википедија, туку ќе ви овозможи и вие да станете дел од оваа уникатна иницијатива и да освоите награди.

Уредувачките денови се одржуваат секој вторник и четврток. Уредувачките денови се изведуваат во текот на денот од 24 часа, со почеток во 00:00 ч. и крај во 23:59 ч. истиот ден. Предвид се земаат сите создадени или подобрени статии на зададената тема од корисници на Википедија на македонски јазик кои ги пријавиле во уредувачкиот ден.

Исто така во текот на 2025 година се одржуваат и уредувачки викенди. Уредувачките викенди се изведуваат во текот на еден викенд, со почеток во 00:00 ч. во сабота и крај во 23:59 ч. во недела.

На крајот на годината ќе им бидат доделени награди на тројцата најплодотворни учесници кои ќе имаат највисок успех при заедничкото и споено бодување од уредувачките денови и уредувачките викенди. Наградите се во облик на вредносни купони за книги или техничка опрема, и тоа:

• Прва награда: купон во вредност од 15.000 денари.
• Втора награда: купон во вредност од 9.000 денари.
• Трета награда: купон во вредност од 6.000 денари.

За да се освои било која награда, потребно е да се исполнат следните критериуми:

• да се учествува во најмалку 100 изданија на уредувачките денови и/или викенди;
• да се учествува во барем 10 од 12-те календарски месеци; и
• да се создадат или подобрат најмалку 150 статии, предлошки или модули.

Бидете дел од најголемата мрежна енциклопедија во светот! Бидете дел од Википедија!

Со доаѓањето на новата година, влегуваме во период на нови почетоци, надеж и инспирација. Ова време од годината е идеално да се потсетиме на важноста на знаењето, културното наследство и заедништвото, кои ги негуваме преку нашата работа во Викимедија МКД. Нова година, како симбол на нови можности, нè инспирира да продолжиме со нашата мисија – збогатување на Википедија на македонски јазик со квалитетни и релевантни содржини.

Нашата мисија од секогаш била не само да создадеме нови статии, туку и да поттикнеме креативност и учење меѓу нашите волонтери и читатели. Времето на празниците ни овозможува да размислуваме за нашата историја, традиција и обичаи, но истовремено и да ги споделуваме тие богатства со светот. Овие денови ни овозможуваат да го истакнеме нашето богатство и уникатност преку дигиталната енциклопедија, обезбедувајќи го достапното знаење за идните генерации. Од историјата на празниците до традиционалните рецепти, од народните песни до обичаите кои се негуваат низ вековите – сето тоа е дел од нашето колективно наследство кое го споделуваме преку Википедија.

Годината што измина беше исполнета со успеси, предизвици и нови достигнувања. Преку нашите проекти, успеавме да внесеме бројни нови содржини и да привлечеме нови волонтери кои го препознаа значењето на нашата мисија. Со секој мал придонес, заедно создаваме база на знаење која ја збогатува Википедија на македонски јазик и станува гордост за сите нас. Новата година, исто така, претставува период кога луѓето си поставуваат нови цели и стремежи. Во овој контекст, сакаме да ги охрабриме сите љубители на знаењето да ја искористат оваа прилика за да се вклучат во нашите активности. Без разлика дали ќе станат активни уредувачи или ќе предложат нови идеи за содржини, секој придонес е значаен.

Во духот на Нова година и Божиќ, сакаме да им се заблагодариме на сите членови, волонтери и поддржувачи на Викимедија МКД за нивниот посветен труд. Вашиот придонес ја прави нашата заедница посилна и поуспешна. Нека оваа Нова година донесе нови предизвици, нови идеи и многу радост. Да продолжиме заедно да градиме иднина исполнета со знаење, разбирање и заеднички успех. Среќна Нова година и нека Божиќните празници ви бидат исполнети со топлина, љубов и среќа!

Уредувачките маратони кои ги организира Викимедија МКД, покрај тоа што ја збогатуваат Википедија на македонски јазик даваат и различни можности за добивање награди на учесниците кои пишуваат статии. Се стремиме да им овозможиме на корисниците на Википедија почесто да имаат можност да освојуваат награди при уредување на Википедија. Нашата посветеност на овој план и овој пат се покажа успешна со постигнување на резултати кои се значајни за нашата енциклопедија.

Овој пат од 16 декември до 22 декември 2024 година се одржуваше уредувачката седмица на тема „Населени места во Пиринска Македонија”. Учесниците во рамките на натпреварот требаше да прошируваат статии поврзани со населени места во Пиринска Македонија. Сите статии требаше да бидат проширени во склад со начелата и правилата на Википедија, па така сите статии мораа да бидат проширени на енциклопедиски стил и да имаат извори. При уредување на натпреварот или по завршувањето на истиот, сите учесници исто така мораа да се запишат со кои статии учествувале.

Во натпреварот имаа можност да учествуваат сите регистрирани корисници на Википедија на македонски јазик, а за да се освои било која награда, потребно беше да се подобрат најмалку 20 статии.

Резултатите се врз основа на додадени зборови на Википедија преку уредените статии, за што е користена посебна википедијанска алатка за пребројување на зборови. Така, со гордост ги објавуваме добитниците на наградите:

• Прва награда: Тиверополник– купон во вредност од 4.000 денари.
• Втора награда: MacedonianMaps– купон во вредност од 3.000 денари.
• Трета награда: Bojan9Spasovski купон во вредност од 2.000 денари.

Уредувачката седмица заврши успешно и така, Википедија на македонски јазик се стекна со 150 проширени статии поврзани со темата „Населени места во Пиринска Македонија”, создадени од 6 различни корисници на Википедија на македонски јазик.

Честитки за вредните корисници и добитници на награди!

Во соработка со Словенечкиот центар во Скопје, Викимедија МКД реализираше уште еден успешен и значаен настан кој значително ја збогати содржината на Википедија на македонски јазик. Овој настан претставуваше уште еден чекор кон остварување на нашата визија за креирање слободни, достапни и квалитетни информации на македонски јазик. Викимедија МКД, преку својата постојана работа, организира различни настани, работилници, обуки и заеднички уредувања, со цел да го намали содржинскиот јаз на македонската Википедија и да создаде поголема достапност на знаењето за пошироката јавност.

На 18 декември 2024 година, во просториите на ОУ „Димитар Миладинов“ во Скопје, се одржа тематска работилница под наслов „Запознајте ја Словенија“. Настанот беше организиран во соработка со Словенечкиот центар во Скопје. Во работилницата учествуваа 15 ученици од ОУ „Димитар Миладинов“ од Скопје, кои имаа можност не само да научат нешто повеќе за Словенија, туку и активно да придонесат за збогатување на содржините на Википедија.

Работилницата беше свечено отворена од заменик амбасадорот на Република Словенија во Македонија, г-ѓа Ника Ротар, која ги поздрави присутните и ја истакна важноста на ваквиот вид соработка меѓу двете земји. По него, кратко обраќање имаше и конзулот на Република Словенија г. Мартин Глажар, кој ја потенцираше културната и образовната вредност на настанот. Претседателот на Словенечкиот центар во Скопје, г-дин Сашо Стојковски, исто така одржа воведен говор, каде што ја нагласи улогата на центарот во промовирање на словенечката култура и јазик во Македонија. Свои обраќања имаа и извршната директорка на Викимедија МКД г-ѓа Снежана Штрковска и раководителката на секторот за јавни дејности во Општина Центар – Скопје г-ѓа  Јагода Јанковска, како и директорката на ООУ “Димитар Миладинов” г-ѓа Марија Варсамис Симоновска.

По официјалните обраќања, учесниците преминаа кон вториот дел од работилницата, кој беше посветен на уредување и преведување статии на Википедија на македонски јазик. Темата на уредувањето беше словенечката кујна – една од најбогатите и најразновидните аспекти на словенечката култура. Во текот на работилницата, учесниците создадоа 22 нови статии, кои сега се достапни за македонската читателска публика.

Овој практичен дел од настанот не само што им овозможи на учесниците да ги развијат своите вештини за пишување и истражување, туку и да придонесат кон слободното знаење. Ваквиот тип на настани се од особена важност за македонската википедијанска заедница, бидејќи го поттикнуваат збогатувањето на локалната енциклопедија со квалитетни и релевантни содржини. Секој придонес, без оглед на неговата големина, е од непроценлива вредност за заедницата. Слободните информации кои се достапни за македонската читателска публика претставуваат големо богатство, кое ја зајакнува нашата култура и образование.

Атмосферата на настанот беше пријатна и инспиративна, а дел од таа енергија може да ја видите преку фотографскиот материјал. Овие моменти го прикажуваат ентузијазмот на учесниците и значењето на заедничката работа во создавањето на нешто што ќе остане трајно и вредно за сите нас.