На 4 ноември 2026 година, во просториите на основното училиште „Коле Неделковски“ во Скопје, се одржа обука за уредување на Википедија, организирана во рамките на образовната програма на Викимедија МКД. На обуката учествуваа 6 ученици од училиштето, кои имаа можност да се запознаат со начинот на функционирање на најголемата слободна енциклопедија во светот, како и со основните правила и принципи за создавање енциклопедиски содржини.
Целта на обуката беше учениците да стекнат нови знаења и практични вештини за користење и уредување на Википедија, но и да ја разберат важноста на слободниот пристап до информации и споделувањето на знаењето. Преку ваквите активности, Викимедија МКД продолжува да го поттикнува активното учество на младите во создавањето квалитетни и проверливи содржини на македонски јазик, истовремено придонесувајќи за развојот на нивната дигитална и информациска писменост.
Обуката беше организирана во два дела, теоретски и практичен, со цел учениците најпрво да се запознаат со основните правила за уредување, а потоа стекнатото знаење да го применат преку самостојна работа.
Во првиот дел, Боса Филиповиќ, менаџер за образовна програма на Викимедија МКД, одржа предавање посветено на Википедија, нејзиното значење и можностите што ги нуди за учениците. За време на предавањето беа претставени основните начела на енциклопедијата, начинот на создавање и уредување статии, како и правилата што треба да се почитуваат при внесувањето нови информации. Посебно внимание беше посветено на преведувањето статии од Википедија на англиски јазик на Википедија на македонски јазик, правилното користење на алатките за превод, приспособувањето на содржините и почитувањето на енциклопедиските стандарди. Учениците добија насоки како да избираат соодветни статии за преведување и како да ги проверуваат и уредуваат преведените текстови, со цел создавање квалитетни и разбирливи содржини на македонски јазик.
Учениците имаа можност да се запознаат и со улогата на уредниците во развојот на Википедија, како и со значењето на волонтерскиот придонес во збогатувањето на слободното знаење. Преку предавањето беше нагласено дека Википедија не претставува само извор на информации, туку и простор во кој секој заинтересиран поединец може активно да придонесе кон создавањето и подобрувањето на енциклопедиските содржини.
По завршувањето на теоретскиот дел, следуваше практичниот дел од обуката, во кој учениците започнаа со уредување и пишување статии на Википедија на македонски јазик. Користејќи ги стекнатите знаења, тие работеа на создавање нови енциклопедиски содржини, притоа применувајќи ги правилата и насоките претставени за време на предавањето. На овој начин, учениците добија можност непосредно да се запознаат со процесот на уредување и да стекнат искуство во самостојното придонесување кон Википедија.
Како резултат на обуката, 6 ученици создадоа вкупно 13 нови статии на Википедија на македонски јазик. Со ова, тие дадоа свој придонес кон збогатувањето на слободните енциклопедиски содржини, а воедно стекнаа корисни вештини што можат да ги применуваат во понатамошното образование и секојдневното користење на дигиталните извори на информации.
Одржувањето на ваквите обуки претставува значаен дел од напорите на Викимедија МКД за приближување на Википедија до младите генерации и за поттикнување на нивната заинтересираност за активно учество во создавањето слободно знаење. Соработката со образовните установи овозможува учениците да се запознаат со нови начини на учење и споделување информации, надвор од традиционалните наставни активности.
Викимедија МКД и во иднина ќе продолжи со организирање обуки и образовни активности во училиштата низ Македонија, со цел вклучување што поголем број млади уредници и понатамошно збогатување на Википедија на македонски јазик. Преку соработката со учениците и наставниците, организацијата останува посветена на својата мисија за ширење на слободното знаење и создавање можности секој да учествува во неговото создавање и споделување.
Фотографскиот дел од обуката може да го погледнете на следнава врска.