Конференциите за наставници на Викимедија МКД претставуваат важен дел од професионалниот развој, овозможувајќи им на учесниците да разменат искуства, да слушнат нови идеи и да се запознаат со различни пристапи во наставата. Тие создаваат простор за отворена дискусија за предизвиците со кои се соочуваат наставниците во секојдневната работа, но и за споделување на успешни практики од училницата. Преку ваквите средби, наставниците добиваат конкретни насоки и примери што можат директно да ги применат во наставниот процес, со цел да го направат поинтерактивен и поефективен.
Дополнително, конференциите поттикнуваат поголема вклученост на наставниците во активности поврзани со слободното знаење и користењето на Википедија како образовен ресурс. Тие воедно придонесуваат за градење на посилна соработка и долгорочни партнерства меѓу наставниците и Викимедија МКД, отворајќи можности за нови заеднички иницијативи и проекти во иднина.
На 6 мај 2026 година, во просториите на ОУ „Гоце Делчев“ во Тетово, се одржа конференција за наставници во организација на Викимедија МКД. На настанот присуствуваа 15 наставници, кои имаа можност да се информираат за улогата на Википедија во образованието и за програмите што ги нуди здружението.
Конференцијата започна во 11 часот и опфати излагања од четири говорници, кои ја претставија работата на Викимедија МКД од различни аспекти.
Настанот го отвори Николче Стојаноски, претседател на Викимедија МКД, кој одржа подетално воведно обраќање за здружението. Тој зборуваше за неговото основање, развојот низ годините и главните цели, со посебен акцент на промовирањето на слободното знаење и зголемувањето на содржините на македонски јазик. Стојаноски ја истакна важноста од соработката со образовните институции, нагласувајќи дека наставниците имаат клучна улога во поттикнувањето на учениците да придонесуваат кон Википедија и да развиваат критички однос кон информациите. Тој, исто така, ги претстави тековните активности и можностите за вклучување во проектите на Викимедија МКД.
Потоа следуваше излагањето на Снежана Штрковска, извршен директор на Викимедија МКД, која се осврна на Википедија како глобален извор на слободно знаење. Таа зборуваше за нејзината историја, принципите врз кои функционира и начинот на кој корисниците можат одговорно да ја користат. Во своето обраќање, таа нагласи дека е особено важно наставниците и учениците да посветат внимание на проверка на извори, точност и неутралност при користење и создавање содржини.
Во продолжение, Боса Филиповиќ, менаџер за образовната програма на Викимедија МКД, ја претстави програмата и можностите за нејзина примена во наставата. Таа објасни како уредувањето на Википедија може да се интегрира во различни предмети и да стане дел од наставниот процес. Притоа истакна дека преку овие активности учениците не само што стекнуваат нови знаења, туку развиваат и вештини како критичко размислување и тимска работа.
Конференцијата беше заокружена со излагањето на Лили Арсова, координаторка на Вики клуб Велес, која сподели практични искуства од работата со ученици. Таа зборуваше за формирањето и функционирањето на вики клубовите, начинот на мотивирање на учениците и позитивното влијание што овие активности го имаат врз нивниот интерес за учење и самодоверба. Нејзиното излагање понуди конкретни примери и идеи што наставниците можат да ги применат во својата работа.
Настанот заврши во позитивна, динамична и инспиративна атмосфера, исполнета со активна дискусија и размена на мислења меѓу присутните наставници и говорници. Учесниците покажаа значителен интерес за концептот на интегрирање на Википедија во наставата и ја истакнаа потребата од вакви обуки и во иднина. Конференцијата придонесе кон зајакнување на соработката меѓу Викимедија МКД и образовните институции, отворајќи можности за нови заеднички активности, проекти и иницијативи насочени кон унапредување на образованието и ширење на слободното знаење.
Фотографскиот материјал од настанот, може да го погледнете на следнава врска.