admin

На 15 јануари 2018 година Википедија наполни цели 18 години. На роденден се носи подарок, а каков подарок се дава на една интернет енциклопедија? Најдобар подарок е пишување на статии, па затоа заедно го прославиме роденденот на Википедија со пишување на нови статии или надополнување на постоечките.

Како резултат на овој повик се вклучија 30 Википедијанци, кои заедно напишаа 44 статии, а на 4 постоечки статии им беа внесени референци.

Детално на следниот линк: https://mk.wikipedia.org/wiki/Википедија:Википедија_18

Среќна нова 2019 година и убави празници ви посакува тимот на ГЛАМ Македонија.

Четирите Вики Клубови во Република Македонија работат активно. Во последните два месеца, односно во периодот од 10 октомври до 9 декември 2018 година, активни беа 41 ученик, кои создадоа и надополнија вкупно 234 статии на Википедија на македонски јазик. За најактивните следуваат награди и дипломи, а наградени се (следуваат корисничките имиња):

Прво место – Jtasevski123

Второ место три добитници – Simonka34, Bogdanovicm и Velichovskas

Трето место три добитници – Kalan Wiki2, S.korceva123 и B.cvetkova02

Четврто место три добитници – Ema Trajcevska, Sofka.01 и V georgiev

За најдобри статии се прогласени статиите:  Виктор Емануел III и Бени Гудман.

Им честитаме на добитниците.

На 16 ноември 2018 година, во големата сала на Општина Охрид се одржа Вики Конференција за наставници, на која учествуваа 67 наставници и стручни соработници, претежно од западниот дел на Македонија.

Во првиот дел „Вовед во Википедија и останатите сестрински проекти“, за кој предаваше претседателката на ГЛАМ Македонија, Снежана Штрковска, учесниците беа запознати со работата на самото здружение, како и со почетокот и создавањето на Википедија како интернет енциклопедија.

Во второто предавање наречено „Википедија како поле за корисен волонтеризам“ на кое предавач беше Наташа Неданоска најмногу стана збор за Вики клубовите низ Македонија. Тоа се клубови во кои членуваат ученици од основните и средните училишта, и заедно со своите ментори создаваат статии кои се објавуваат на Википедија. Освен што волонтираат, се дружат и учат, Неданоска истакна дека овој начин за користење на слободното време е корисен од повеќе аспекти.

На третото предавање „Извори на информации“ кое го предаваше Гордана Јовиќ-Стојковска, најмногу се кажа за тоа како се ставаат референци на еден текст на Википедија, како и за нивната важност во уредувачките финеси.

На крај од конференцијата, Снежана Штрковска одржа еден воведен курс за уредување на Википедија, при што учесниците можеа да се здобијат со првични информации како да започнат да бидат уредувачи на Википедија. На курсот беа присутни и ученици од ОУ.„Кочо Рацин“ од Охрид, учесници во Вики клуб Охрид, кои помогнаа и практично покажаа како тие уредуваат на Википедија.

За време на затворањето на конференцијата, беа доделени сертификати на присутните учесници.

ГЛАМ Македонија испрати свои претставници на меѓународниот уредувачки маратон кој се одржа во Софија на 10 ноември 2018 година. Темата за уредување на Википедија беше европското културно наследство, а беа создадени вкупно 58 статии на повеќе јазични Википедии. Покрај македонските претставници, на заедничкото уредување учествуваа и претставници од Србија, Грција, Романија, Украина, Бугарија, и Германија.

Настанот беше организиран од страна на Гете институтот во Софија.

Соработката со Археолошкиот музеј на Република Македонија официјално започнува со потпишаниот договор меѓу ГЛАМ Македонија и Музејот. Со оваа соработка очекуваме на Википедија на македонски јазик да се создадат нови статии поврзани со историјата на мекдонскиот народ, како и да се подобрат постоечките, со текст, цитати, и фотографии што македонската наука ги одобрува.

Договорот е дел од програмата ГЛАМ на Здружението, односно спаѓа во доменот на соработка со  галерии, библиотеки, архиви, музеи и сродните институции.

По повод празникот на Унгарија „23 Октомври“, на 24 октомври 2018 година се одржа средба и работилница на членовите на Вики Клубот во Музеј на македонската борба, што го раководи здружението ГЛАМ Македонија и членови на здружението на Унгарците во Република Македонија „Теледом“.

Присутните имаа можност да го видат документарниот филм за Унгарците од Крушево.

На работилницата членовите на Вики Клубот пишуваа биографии на Википедија на македонски јазик за Унгарците учесници во Унгарската револуција од 1956 година. Беа создадени и надополнети вкупно 14 статии.

На присутните им беа доделени благодарници како и по еден примерок од двојазичната книга „По нив остана празнина“ за унгарските бегалци од 1956 година во Македонија.

Дел од атмосферата на фотографиите:

Млади се обучуваат како да објавуваат на Википедија, како да ги проверат фактите и придонесуваат во македонската верзија на енциклопедијата. Нивниот придонес е значаен особено ако се спореди англиската Википедија со 6 милиони статии и македонската со 97 илјади статии. Што порачуваат Википедијанците?

Извор: СлободнаЕвропа

Од 13-15 октомври 2018 година во Лaвoв, Украина се одржа седмата по ред конференција на Википедијанците кои се активни во земјите од централна и источна Европа. На конференцијата зедоа учество преставници на повеќе од 20 земји, меѓу кои и претставници на ГЛАМ Македонија.

Програмата на конференцијата беше составена така што имаше интересни теми за слушање за долгогодишните, но и за новите Википедијанци.

Дел од атмосферата на фотографиите:

На 28 септември 2018 година, е основан четвртиот Вики Клуб под раководство на ГЛАМ Македонија, Вики Клуб Штип. На двете работни сесии за обука, учениците покажаа голем интерес за уредување на Википедија. Беа обучени 22 членови на новооснованиот Вики Клуб, и беа создадени 6 нови статии на Википедија на македонски јазик. Клубот работи под раководство на координаторот Јованка Шалева.

Истиот ден беше потпишан меморандум за соработка со училиштето „Коле Нехтенин“.

На фотографиите може да видите дел од учесниците и атмосферата: