admin

Викимедија МКД постојано ги проширува своите активности на терен, стремејќи се да опфати што е можно повеќе луѓе од различни делови на земјата и да ги воведе во светот на слободното знаење. Една од основните цели на организацијата е да им го доближи концептот на Википедија и нејзината важност на пошироката јавност, особено преку едукативни обуки и вклучување на нови уредувачи. Образовната програма на Викимедија МКД е насочена кон градење на заедница што активно придонесува со квалитетни содржини на Википедија на македонски јазик.

Во рамки на овие напори, на 2 јуни 2025 година, Викимедија МКД реализираше обука за уредување на Википедија и уредувачки маратон со членови на Организацијата на жените во Свети Николе. Настанот на предавање за Википедија и обука за членовите на Вики клубот започна во 13 и 30 часот во просториите на Општина Свети Николе и вкупно беа присутни 10 учесници.

Настанот започна со едукативно предавање од Боса Филиповиќ, менаџер за образовна програма на Викимедија МКД, која ги запозна присутните со основните принципи на Википедија, важноста на слободното знаење и правилата за уредување на енциклопедијата. Таа им објасни како функционира платформата, како се проверуваат изворите на информации и како се пишуваат енциклопедиски статии. Присутните со голем интерес го следеа предавањето, поставувајќи прашања за тоа како можат да придонесат за подобрување на содржините на Википедија.

По воведниот дел, присутните добија можност и практично да се запознаат со уредувањето, создавајќи свои први статии на Википедија на македонски јазик. Со помош и поддршка од тимот на Викимедија МКД,  вкупно напишаа 15 статии.

Овој настан претставува уште еден чекор кон остварување на целта за зголемување на бројот на активни уредувачи и унапредување на содржините на Википедија на македонски јазик. Вклучувањето на нови заедници и организации, како што е Организацијата на жените во Свети Николе, покажува дека интересот за учество во создавањето слободно достапно знаење расте. Викимедија МКД и понатаму ќе продолжи со организирање на вакви обуки низ целата земја, со цел да инспирира што повеќе граѓани да се приклучат кон движењето за слободно знаење.

Фотографскиот материјал од настанот може да го видите на следнава врска.

Викимедија МКД  постојано организира уредувачки маратони со цел да ја зголеми слободната содржина на македонски јазик. Со различни теми, но со иста цел, уредувачките натпревари и маратони даваат и различни можности за добивање награди на учесниците кои се пројавиле. Овој пат, Викимедија МКД организира уредувачка седмица на тема „Управување со отпад“. Потфатот е дел од меѓународната иницијатива „Вики за човековите права 2025“.

Уредувачката седмица „Управување со отпад“ се одржува  од 2 јуни 2025 година и завршува на 8 јуни 2025 година. Сите статии треба да бидат напишани во склад со начелата и правилата на Википедија, па така сите статии треба да бидат напишани на енциклопедиски стил и да бидат поткрепени со соодветни извори. При уредување на натпреварот, или по завршувањето на истиот, сите учесници треба да си го запишат своето корисничко име на проектната страница, заедно со статиите кои ги напишале. Покрај пишувањето на нови статии, учесниците имаат можност и значајно да надополнат некоја постоечка статија.

Во натпреварот имаат можност да учествуваат сите регистрирани корисници на Википедија на македонски јазик, а за најдобрите учесници се обезбедени награди.

Награди ќе им бидат доделени на тројцата најплодотворни учесници во облик на вредносни купони, и тоа:

• Прва награда: купон во вредност од 4.000 денари.
• Втора награда: купон во вредност од 3.000 денари.
• Трета награда: купон во вредност од 2.000 денари.

За да се освои било која награда, потребно е да се создадат или подобрат најмалку 20 статии!

Ве повикуваме да се вклучите и да дадете свој придонес кон збогатување на слободното знаење за една од најважните теми поврзани со заштитата на животната средина. Преку вашето учество во уредувачката седмица „Управување со отпад“, не само што ќе помогнете во информирањето на јавноста, туку ќе имате и можност да освоите награда за вашиот труд. Уредувајте, натпреварувајте се и инспирирајте други! Заедно создаваме подобра и поодржлива иднина – преку слободното знаење!

Од 16 до 18 мај 2025 година, во Прага, Чешка се одржа конференција посветена на младите википедијанци –„Викимедија младинска конференција“. На настанот присуствуваа околу 80 млади и активни уредници од повеќе од 60 држави, под заедничката тема: „Како да привлечете млади луѓе на Википедија?“ Целта на конференцијата беше да се создаде простор за дискусија, соработка и размена на идеи за зголемување на младинското учество во движењето Викимедија. Програмата беше збогатена со работилници, дебати и интерактивни сесии, насочени кон идентификување на предизвиците со кои се соочуваат младите волонтери, како и начините за нивно надминување.

Македонија имаше свој тим кој присуствуваше на настанот составен од Јован Тасевски – менаџер за заедница и логистика на Викимедија МКД, Симона Трајкоска и Олја Алексовска – волонтери во организацијата. Тие активно учествуваа во сите дискусии и придонесоа со свои перспективи за состојбата во Википедија на македонски јазик.

Првиот ден започна со воведен говор од Клара Јоклова, извршна директорка на Викимедија Чешка и организатор на конференцијата. Следеше сесија за запознавање, социјални игри и дебата околу темата „Бројот на млади луѓе кои користат Википедија се намалува“, каде се издвоија различни мислења и предлози за справување со овој тренд. Во текот на денот, се зборуваше и за тоа дека гласот на младите често е занемарен и недоволно слушнат во заедниците. Вечерта продолжи во релаксирана атмосфера со заедничка вечера и дружење.

Вториот ден започна со дебата за ризикот од „прегорување“ кај младите волонтери поради недоволна поддршка или недоволно вреднување на нивниот труд од поискусните уредници. Во продолжение следуваа низа предавања на различни теми поврзани со Википедија и заедницата, со особен акцент на меѓусебната размена на искуства.

Третиот ден беше резервиран за групна работа каде се разгледуваше улогата на младите во локалните заедници, како и можностите за регионална и јазична соработка. На крајот, учесниците беа поделени според региони и разменија идеи за заеднички проекти во иднина. Конференцијата заврши свечено, со говори на организаторите и инспиративно обраќање од Клара Јоклова, која ги повика сите млади википедијанци да продолжат со ентузијазам и соработка, и да го шират духот на заедништво во своите локални заедници.

За македонските учесници, ова беше повеќе од обичен настан – беше вредно и инспиративно искуство кое ги поттикна на размислување, но и на акција. Размената на идеи со врсници од целиот свет, препознавањето на сличните предизвици и желбата за соработка отворија нови хоризонти за ангажман на младите википедијанци. Овој настан покажа дека македонските википедијанци имаат што да понудат и дека нивниот глас се слуша и вреднува во глобалната заедница.

Деветтата конференција на википедијанци позната како Викилајв се одржа на 10 и 11 мај 2025 година во Белград, во СКИП Центарот. Настанот се одржа под слоганот „Заедно градиме свет на слободно знаење“ и собра околу 50 уредници и соработници на проектите на Википедија. Овогодишната програма се фокусираше на работилници, дебати и создавање простор за дискусија за актуелни теми на Википедија.

Викилајв е локална конференција на википедијанци од Србија и од регионот. Собирот е наменет за волонтери, уредници, партнери и секој што сака да биде дел од заедница која секојдневно придонесува за слободно знаење на интернет преку работа на Википедија и други проекти на Викимедија. Од Македонија претставник на настанот беше Боса Филиповиќ- менаџер за образовна програма на Викимедија МКД.

Во првиот дел на предавањето предавачите се осврнаа на иднината на Википедија, локалните и глобалните новости, веродостојноста на референците, но и раното усвојување на критичкото размислување. Презентирани беа актуелните трендови и предизвици со кои се соочуваат проектите на Викимедија: дезинформации, говор на омраза, релевантност, прегорување, како и прилагодување кон брзите технолошки промени.

Најголемо внимание привлече психолошкиот панел „Однесување во онлајн заедницата и предизвици“, предводен од Небојша Ратковиќ, менаџер на образовната програма на Викимедија Србија. Целите на презентацијата и работилницата беа пред сè да се разбере од каде доаѓаат конфликтите, одредени однесувања во семрежната заедница како што е заедницата на Википедија, да се размисли за следниот пат кога ќе се најдеме во конфликтна ситуација, да се одговори соодветно и да се насочи конфликтот кон нешто конструктивно што може да ја подобри работата на заедницата. За време на панел-дискусијата, учесниците решаваа ситуациски задачи, а имаа и можност за лична рефлексија.

Претставникот на Викимедија МКД, Боса Филиповиќ во своето излагање ја претстави работата на македонската заедница, со посебен фокус на уредувачките натпревари и маратони што ги организира Викимедија МКД. Филиповиќ детално зборуваше за методологијата на спроведување на овие настани, нивната едукативна улога, како и за ефектите што ги имаат во зголемувањето на содржините на Википедија на македонски јазик. Таа истакна дека преку тематски уредувачки активности, заедницата успева да мотивира нови уредници и да создаде простор за учење, вмрежување и размена на искуства. Исто така таа зборуваше за различен тип на наградно уредување кое го има спроведено Викимедија МКД, наместо по поени, наградата да се доделува со извлекување. Овие уредувачки маратони на Викимедија МКД беа еднодневни и позврзани со светските денови. Филиповиќ ги престави минатогодишниот уредувачки маратон „Чајанка“ и овогодинешниот уредувачки натпревар за џез, како и плановите за идните натпревари од овој тип. Нејзината презентација наиде на позитивни реакции од присутните.

Вториот ден од конференцијата започна со презентација на Небојша Ратковиќ, на тема две децении од образовната програма на Викимедија Србија. Ратковиќ го презентираше раѓањето на идејата за користење на Википедија во образованието, првата статија на Википедија, акредитациите и професионалната обука, организирањето образовни програми и содржини за млади и студенти, и ги покани сите присутни да се приклучат на програмата и да предложат нови идеи.

Темата за генеративна вештачка интелигенција која е веќе широко застапена во сите области, а какви можат да бидат ризиците при нејзино користење, објасни професорката Ана Ковачевиќ од Факултетот за безбедност во Белград.

Конференцијата заврши со доделување на наградата „Бранислав Јовановиќ“. Овогодинешен добитник е Жана Гњатовиќ, уредничка на Википедија, библиотекарка во библиотеката „Карло Бјелицки“ во Сомбор, каде што ги спроведувала активностите од проектот Вики Сениор.

Фотографскиот материјал од настанот може да го погледнете на следнава врска.

Викимедија МКД редовно организира уредувачки маратони со цел поттикнување на младите да се вклучат во создавање и споделување слободно знаење преку Википедија на македонски јазик. Преку овие настани, учесниците имаат можност да научат како се пишуваат и уредуваат енциклопедиски статии, да се запознаат со принципите на Википедија, и истовремено да стекнат нови знаења од различни области.

На 8 мај 2025 година, Викимедија МКД организираше специјален уредувачки маратон наменет за ученици од Вики клубот од СУГС Гимназија „Јосип Броз-Тито“ од Скопје. Вкупно учествуваа 10 ученици под менторство на професорката Ирена Трајковска Стерјовска. Настанот беше посветен на темата за кучињата и имаше за цел да ја подигне свеста за односот кон животните, како и да поттикне активно граѓанско учество преку едукација и пишување статии.

Како дел од активностите, учениците го посетија Јавното претпријатие „Лајка“ – стационарот за бездомни кучиња во Скопје. Таму кратко предавање одржа Столе Велковски, вработен во институцијата и учениците имаа можност да се запознаат со работата на оваа институција, да видат како се згрижуваат и третираат кучињата, и да поразговараат со персоналот за секојдневните предизвици и значењето на хуманото постапување со животните. Посетата беше едукативна, но и емоционална, бидејќи учениците одблизу се сретнаа со кучиња кои моментално се наоѓаат под грижа на стационарот.

По посетата, беше одржан уредувачкиот маратон, каде што учениците, со поддршка менторите на Викимедија МКД, работеа на креирање и уредување статии на Википедија поврзани со познати кучиња на Википедија и слични теми. На тој начин, тие директно придонесоа кон зголемување на квалитетот и обемот на содржините достапни на Википедија на македонски јазик. Вкупно беа напишани 11 статии.

Настанот претставуваше одлична можност учениците да ја комбинираат теоријата со пракса, да научат нешто ново и притоа да направат корисен придонес за заедницата. Ваквите активности покажуваат како соработка меѓу образовните институции и невладиниот сектор може да резултира со значајни едукативни и општествени придобивки.

Фотографскиот материјал од настанот може да го погледнете на следнава врска.

Со редовното организирање на уредувачки натпревари и маратони, Викимедија МКД постојано создава нови и возбудливи можности за збогатување на Википедија на македонски јазик. Овие програмски активности не само што придонесуваат кон зголемување на слободната содржина на македонски јазик, туку и ја поттикнуваат заедницата на уредници да биде покреативна, поангажирана и посветена на споделувањето на знаење со пошироката јавност.

Темите на уредувачките настани се разни, но секогаш ја носат истата цел — создавање квалитетна и веродостојна содржина достапна за секого. Освен тоа, овие настани често нудат дополнителна мотивација за учесниците преку награди, признанија и заедничка прослава на придонесите.

По повод Меѓународниот ден на џезот — 30 април, Викимедија МКД организираше еднодневен уредувачки маратон на тема „Џез“. Настанот беше отворен за сите корисници на Википедија на македонски јазик, кои беа поканети да учествуваат со пишување и подобрување на статии поврзани со џез-музиката.

Во текот на маратонот, вкупно 24 уредници се приклучија и напишаа 26 нови статии на македонски јазик. Темите опфатија музичари, албуми, стилови, фестивали и значајни моменти од историјата на џезот. Како дополнителен поттик, Викимедија МКД обезбеди награда која беше доделена по случаен избор на еден од учесниците. Извлекувањето на добитникот се одржа на 6 мај 2025 година и беше пренесувано во живо преку официјалниот инстаграм профил на Викимедија МКД. Добитникот на награда бежичен звучник е Viksi123 со статијата Фулано (бенд).

Со ваквите настани, Викимедија МКД не само што ја збогатува содржината на Википедија на македонски јазик, туку и ја зацврстува заедницата, поттикнувајќи активно учество, креативност и вреднување на волонтерскиот придонес. Честитки до сите учесници за нивниот придонес и посветеност и честитки до добитникот на награда.

На 26 април, во просториите на Музејот на современата уметност во Скопје, со почеток во 18:00  се одржа јубилеен настан за одбележување 10 години од спроведувањето на проектот „Викиекспедиции“. Настанот беше организиран од неговите членови, кои се дел од македонскиот огранок на Википедија, здружението Викимедија МКД. Настанот привлече бројни посетители – љубители на фотографијата, историјата, културата и вљубеници во македонското рурално наследство, кои имаа можност да се запознаат со една поинаква и автентична слика за нашата земја.

Проектот „Викиекспедиции“ е долгогодишна иницијатива којашто целосно се спроведува на волонтерска основа од 2015 година. Главна цел е систематско документирање на македонските села и нивната околина преку фотографирање, истражување на локалната историја и култура, како и преку создавање и збогатување содржини на Википедија на македонски јазик. Благодарение на овој проект, многу населени места и нивните природни и културни богатства, кои сè уште остануваат недоволно познати за пошироката јавност, денес се видливи и достапни за секој читател на Википедија.

Од започнувањето на проектот до денес променети се осумнаесет различни членови на екипата којашто ги спроведува теренските истражувања, но составот во последните шест години e стабилен и го сочинуваат четири членови, секој со своја специфична улога: истражувач, кој ги проучува и бележи податоците за селата и нивните знаменитости; фотограф, кој визуелно го документира сето она што е забележително и значајно; возач, кој ја олеснува мобилноста и пристапот до понекогаш тешко достапни населени места; и оператор на дрон, кој овозможува снимање од птичја перспектива, притоа откривајќи нови димензии на македонската убавина.

Во изминатите десет години, во рамки на проектот се истражени 46 различни области низ Македонија, посетени се вкупно 1083 села, што претставува речиси 62% од сите села во државата. Притоа, направени се над 18.500 фотографии кои сведочат за живописната природа, богатото културно наследство и автентичниот рурален живот. Овие материјали резултираа со создавање и подобрување на повеќе од 3.200 статии на Википедија на македонски јазик, што претставува значаен придонес кон дигитализацијата и зачувувањето на македонската култура.

На изложбата беа претставени 100 внимателно одбрани фотографии, кои го отсликуваат истражувачкиот дух на тимот, љубовта кон татковината и стремежот кон зачувување на сето она што ја прави Македонија уникатна. Посетителите имаа можност да видат импресивни пејзажи, автентична архитектура, цркви и манастири, споменици на културата, како и моменти од секојдневниот живот во руралните заедници. Покрај тоа, изложени беа и карти на Македонија со местоположбата на документираните места и знаменитости, фотографии од учесниците за време на експедициите, дел од опремата со којашто се создадени фотографиите, бележлиниците со прибраните информации од истражувањата, како и брендирани производи.

Настанот беше збогатен и со официјални обраќања на членовите на тимот на проектот: Тони Ристовски, Кирил Симеоновски, Нино Богдановски, Деан Лазаревски како и најмладиот член на тимот Никола Трајковски. Тие пред присутните говореа за мотивацијата зад проектот, за предизвиците на теренските истражувања, како и за важноста на мисијата да се зачува и промовира богатото македонско културно и природно наследство. Нивните инспиративни зборови уште повеќе ја нагласија вредноста на вложениот труд и важноста на волонтерството во зачувувањето на идентитетот и историјата на Македонија.

Настанот не беше само од културна природа, туку и силна порака за важноста на документацијата, истражувањето и зачувувањето на нашето заедничко наследство. Тој претставуваше вистинско патување низ селата во Македонија, нудејќи една поинаква перспектива за убавините на нашата земја – таа што ја имаат оние кои патуваат низ заборавените патишта и ги забележуваат скриените бисери на македонската рурална душа.

Фотографскиот материјал од настанот може да го погледнете на следнава врска.

Во рамките на програмата „ГЛАМ“ на Викимедија МКД, секоја година се спроведуваат активности со јасно дефинирана тематска насока, посветени на културното и општественото наследство. Годинава, темата „Занаети и народни носии“ зазема централно место во оваа програма, со цел не само да се документираат туку и да се оживеат занаетчиството и традициите кои се закануваат да бидат заборавени. Преку создавање нови и подобрување на постојните содржини на Википедија на македонски јазик и нејзините сродни проекти, Викимедија МКД продолжува да гради мост меѓу младите генерации и богатото македонско културно наследство.

Во тој дух, на 15 април 2025 година, Вики Клуб Велес, под менторство на професорката Лили Арсова, организираше едукативна работилница во ковачницата „Ковач Гоце“, лоцирана во населбата Превалец во Велес. Настанот беше вистинско враќање во минатото, во времето кога ковачот беше еден од најпочитуваните занаетчии во секое маало. Учениците-википедијанци имаа можност да го запознаат Гоце Грујов – последниот активен ковач во Велес, кој го наследил занаетот од својот татко Ацо Грујов, започнувач на оваа семејна традиција во 1970 година. Денес, ковачницата „Ковач Гоце“ сè уште пулсира со звукот на чеканот и мирисот на загреано железо, благодарение на посветеноста на Гоце, кој со љубов и вештина продолжува да ја раскажува приказната на својот род.

За време на работилницата, младите википедијанци одблиску се запознаа со техниките на ковање, видовите алати што се користат – од менгемиња и различни типови чекани до алати специјално изработени за обликување на метал. Грујов демонстрираше целосен процес – од загревање до обликување, во што учесниците уживаа со сите сетила. Звуците на металот, искрите и топлината од огништето создадоа автентична атмосфера која долгорочно ќе остане во нивната меморија.

Следниот ден, на 16 април, се одржа втората работилница, овојпат во грнчарската работилница на Ване во населбата Којник во Велес. Таму, учениците имаа можност да го следат целиот процес на изработка на грнчарски производи – од обработка на глината, нејзино обликување на грнчарско колце, до завршното печење во печка која достигнува температури до 900°C. Секоја алатка, секој движење и секој детал беа објаснети со ентузијазам, а атмосферата беше исполнета со љубопитност и восхит. На крајот од оваа креативна авантура, грнчарот Ване им подари на учениците по еден уникатен, рачно изработен производ – симболичен подарок кој ќе ги потсетува на искуството и знаењето што го стекнаа.

Со овие активности, Викимедија МКД не само што ги зајакнува вештините на младите википедијанци и го поттикнува нивниот интерес за културното наследство, туку и активно придонесува кон негово зачувување преку слободни и достапни содржини на Википедија. Занаетите и народните носии не се само дел од минатото – тие се жива врска со нашиот идентитет, вредности и историја. Затоа, нивната документација и промоција претставуваат инвестиција во колективната меморија на едно општество.

Фотографскиот материјал од работилниците може да го погледнете на следнава врска.

Како дел од заложбите за збогатување на слободното знаење и зајакнување на културната размена помеѓу државите, Викимедија МКД во соработка со  Словенечки центар – Скопје и со поддршка од Амбасадата на Република Словенија , го организираше уредувачкиот натпревар „Запознајте ја Словенија“. Натпреварот беше отворен за сите членови на Вики клубовите во Македонија, а неговата цел беше преку пишување и подобрување на статии да се приближи Словенија до македонската јавност и да се прошири слободното знаење за оваа држава.

На 15 април 2025 година, со почеток во 12:00 часот, во просториите на Викимедија МКД во Младинскиот културен центар (МКЦ) во Скопје, се одржа официјалното доделување на наградите и сертификатите за петте најуспешните учесници од уредувачкиот натпревар „Запознајте ја Словенија“. Овој натпревар имаше за цел да се поттикне креирање и збогатување на содржини за Словенија — нејзината историја, култура, географија, знаменитости, познати личности и други теми поврзани со словенечкото општество. Преку натпреварот, волонтерите-уредувачи создадоа нови и квалитетни статии, со што придонесоа кон слободното и достапно знаење на македонски јазик.

На настанот присуствуваа добитниците на награди, претставници од Викимедија МКД, претставници од Словенечки центар-Скопје и претставници од амбасадата на Република Словенија. Најпрво се обрати Боса Филиповиќ, менаџер за образовна програма на Викимедија МКД која ги поздрави присутните, по неа говор имаше извршниот директор на Викимедија МКД, Снежана Штрковска која ја назначи важната улога на ваквиот вид уредувачки натпревари и по неа се обрати и Сашо Стојковски од Словенечки центар- Скопје. Меѓу присутните беа и конзулот на Република Словенија во Македонија, г.Мартин Глажар како и Амбасадорот на Република Словенија, г. Грегор Прескер кој ги врачи наградите и сертификатите на петтемина најуспешни уредувачи и во своето обраќање ја нагласи важноста на дигиталната писменост, слободниот пристап до информации и заедничкото градење мостови меѓу културите преку соработка и знаење. Тој исто така ја изрази благодарноста за заложбите на уредувачката заедница и поддршката од Викимедија МКД.

Со ова свечено доделување, официјално заврши уште еден успешен проект наменет за ширење на слободното знаење, градење на врски меѓу народите и промоција на културната размена. Викимедија МКД се заблагодарува на сите учесници за нивниот придонес, како и на Словенечки центар – Скопје и Амбасадата на Република Словенија за соработката и поддршката во реализацијата на натпреварот.

Фотографскиот материјал од настанот може да го погледнете на следнава врска.

Викимедија МКД континуирано работи на збогатување на содржините на Википедија на македонски јазик преку организирање уредувачки маратони, натпревари и работилници на најразлични теми. Овие активности имаат за цел да ги поттикнат и мотивираат постоечките и новите уредувачи да создаваат и подобруваат статии со висок квалитет, да истражуваат, да се поврзуваат и да придонесуваат кон слободното знаење достапно за сите.

Еден од ваквите настани беше и уредувачкиот натпревар на тема „Хемиски елементи и изотопи“ , кој понуди можност за продлабочување на содржините од областа на хемијата, но и за ангажирање на заедницата во создавање енциклопедиски материјали со научна тематика. Натпреварот се одржуваше од 10 февруари 2025 година до 9 март 2025 година.

Главна тема на натпреварот беа хемиските елементи и нивните изотопи. Сите статии требаше да бидат напишани во склад со начелата и правилата на Википедија, па така сите статии требаше да бидат напишани на енциклопедиски стил и да имаат извори. При уредување на натпреварот или по завршувањето на истиот, сите учесници исто така требаше да се запишат со кои статии учествувале. Статиите ги прегледуваше Оценувачкиот одбор, кое беше составено од тројца википедијанци кои не можеа да учествуваат на натпреварот.

Наградите за овој натпревар се вредносни купони, а за да се освоеше било која награда, потребно беше да се создадат или подобрат најмалку 25 статии оценети со просечна оценка од најмалку 2,0 од страна на членовите на Оценувачкиот одбор. Вкупно учествуваа 9 корисници и беа напишани 252 статии. Па така, добитниците на награди се следниве:

• Прва награда: купон во вредност од 12.000 македонски  денари –  Тиверополник
• Втора награда: купон во вредност од 6.000 македонски  денари  –  P.Nedelkovski
• Трета награда: купон во вредност од 3.000 македонски денари – Lili Arsova

Покрај овие три награди, овој уредувачки натпревар ги предвидуваше и следниве награди:

• Награда за најдобра статија –  вредносен купон во висина од 5.000 денари- „Проширен периоден систем“ од  Тиверополник
• Награда најдобар нов учесник – вредносен купон во висина од 2.000 денари – наградата не е доделена

Со овој натпревар, Викимедија МКД продолжува да го поттикнува интересот за научни теми и активно да ја збогатува Википедија со квалитетни и проверени информации. Честитки до сите учесници за нивниот придонес и посветеност, и се радуваме на следните уредувачки предизвици!