Секоја година, преку активности на Википедија, Викимедија МКД се приклучува кон одбележувањето на Меѓународниот ден на Ромите, со цел да се поттикне инклузија, видливост и рамноправна застапеност на ромската заедница во дигиталниот простор. Овој ден претставува значајна можност да се истакне богатото културно наследство, историјата и придонесот на Ромите во општеството, но и да се надминат стереотипите преку споделување на точни и проверени информации. Преку создавање и уредување на содржини на Википедија на македонски јазик, се овозможува поширок пристап до релевантни и веродостојни информации, достапни за сите. Ваквите иницијативи не само што ја збогатуваат енциклопедијата, туку и активно придонесуваат кон градење поинклузивно, поинформирано и посензитивно општество.
Па така, на 7 април 2026 година во соработка со УСС УКИМ успешно се реализираше обуката „Стани Википедија уредувач: Обука за пишување статии на македонски јазик“, наменета за сите заинтересирани за создавање и уредување на содржини на Википедија на македонски јазик. За време на обуката, десетте учесници имаа можност да се запознаат со правилната структура и начинот на пишување на статии, како и со стандардите и правилата што треба да се почитуваат при нивното уредување. Посебен акцент беше ставен на прилагодување на содржините на македонски јазик. Учесниците се стекнаа со практични вештини и знаења, преку кои можат активно да придонесуваат кон збогатувањето на Википедија со квалитетни и релевантни содржини. Во рамките на обуката беа создадени 19 нови статии, посветени на теми поврзани со „Меѓународниот ден на Ромите“, со што дополнително се одбележа овој значаен ден и се збогати енциклопедиската содржина на македонски јазик.
Исто така, како и секоја година, така и годинава, Викимедија МКД активно се вклучи во меѓународниот повик за одбележување на „Меѓународниот ден на Ромите“ преку организирање на уредувачки маратон. Овие иницијативи претставуваат значајна платформа за поттикнување на колективно учество, размена на знаења и зголемување на видливоста на теми поврзани со ромската заедница на Википедија. Преку ваквите настани се охрабруваат нови и постоечки уредувачи да придонесуваат со квалитетни, неутрални и добро поткрепени содржини.
Годинава се вклучија 17 учесници од различни возрасни групи и со различно ниво на искуство, кои заеднички работеа на создавање и уредување на статии. Нивниот ангажман резултираше со 29 нови статии на Википедија на македонски јазик, со што значително се збогати содржината поврзана со ромската историја, култура и современо творештво. Меѓу обработените теми се издвојуваат статии за: Музеј на кошничарство на Ромите, Светски фестивал на Ромите , како и за музичари и други познати личности кои се по потекло Роми: Џо Завинул , Ференц Снетбергер , Мерцедес Бенцо и други. На овој начин се овозможува поширока достапност до информации кои претходно биле недоволно застапени на македонски јазик.
Со заеднички напор, ентузијазам и посветеност, учесниците уште еднаш покажаа дека Википедија е моќна алатка за споделување знаење, промовирање на културната разновидност и поттикнување на општествена инклузија. Преку ваквите иницијативи не само што се зголемува количината на достапни информации на македонски јазик, туку се подобрува и нивниот квалитет, веродостојност и застапеност на различни заедници. Овие активности придонесуваат кон градење на свесност за важноста на еднаквата репрезентација во дигиталниот простор и ги охрабруваат идните генерации активно да се вклучат во создавање слободно и достапно знаење за сите. Заедно ја збогатуваме Википедија и даваме значаен придонес во градењето на поинклузивно, информирано и правично општество!
Фотографскиот материјал од обуката можете да го погледнете на следнава врска.