admin

Викимедија МКД  продолжува со уредувачките маратони со цел да ја зголеми слободната содржина на македонски јазик.  Уредувачките натпревари и маратони даваат и различни можности за добивање награди на учесниците. За последен пат оваа година Викимедија МКД организира уредувачка седмица со тема „Населени места во Пиринска Македонија”.

Натпреварот почнува на 16 декември 2024 г. во 00:00 ч. и завршува на 22 декември 2024 г. во 23:59 ч. Учесниците во рамките на натпреварот треба да прошират статии поврзани со населени места во Пиринска Македонија. Сите статии треба да бидат проширени во склад со начелата и правилата на Википедија, па така сите статии треба да бидат проширени на енциклопедиски стил и да имаат извори. При уредување на натпреварот или по завршувањето на истиот, сите учесници треба да се запишат со кои статии учествувале.

Во натпреварот имаат можност да учествуваат сите регистрирани корисници на Википедија на македонски јазик.

Награди ќе им бидат доделени на тројцата најплодотворни учесници во облик на вредносни купони, и тоа:

• Прва награда: купон во вредност од 4.000 денари.
• Втора награда: купон во вредност од 3.000 денари.
• Трета награда: купон во вредност од 2.000 денари.

За да се освои било која награда, потребно било да се подобрат најмалку 20 статии!

Учествувајте и освојте награди. Викимедија МКД ќе продолжи и во новата година да организира уредувачки натпревари. Заедно ја правиме Википедија подобра, поквалитетна и подобро напишана енциклопедија!

Викиекспедициите на Викимедија МКД претставуваат уникатен проект кој спојува истражување, документација и споделување на знаењето за богатото природно и културно наследство на нашата земја. Оваа иницијатива, која ја надополнува Википедија со нови содржини и информации за географските подрачја низ сите региони на Македонија, ја прикажува нашата историја и традиција. Со помош на овие експедиции, локалните приказни и скриените богатства стануваат достапни за јавноста.

По третата викекспидиција во која нашиот тим ја истражуваме Општина Тетово, четвртата викиекспeдиција ја искористивме да ја истражиме Општина Брвеница.  Оваа викиекспидиција беше спроведена на верскиот празник Голема Богородица (28 август).

Како прво село на експедицијата беше најоддалеченото планинско село, Гургурница. Од таму тимот се спушти во селото Стенче, и ја посети црквата „Св. Петка“ (кон селото Блаце) и базиликата кај Стенчевската тврдина, која е една од позачуваните во Македонија. Потоа нашиот тим се упати во новата црква „Св. Екатерина“, каде беа пречекани од локалните жители, кои им помогнаа да дојдат до главната селска црква „Св. Илија“ и да влезат внатре, бидејќи црквата беше заклучена, и тоа не само црквата, туку и влезните порти во дворот. По ова, беше фотографирано централното основно училиште „Гоце Делчев“ и тимот продолжи кон соседното село Волковија. Од таму, википедијанците се вратија кон Брвеница, но претходно се исклучија од регионалниот пат, за да дојдат до историското село Горно Фалише, кое денес влегува во атарот на Стенче. Од селото е зачувана само селската црква „Св. Атанасиј.

Потоа беше посетено селото Теново, каде има четири верски објекти и основно училиште и една од најнеобичната архитектура на нови куќи. По Теново, следуваше селото Радиовце, каде селската црква, џамијата и основното училиште се наоѓаат во непосредна близина. Од тука нашиот тим се упати кон селото Милетино каде се задржа подолго време да ги фотографира петте цркви и една џамија разместени на различни места.

Веднаш по Милетено следуваше селото Челопек. Помеѓу Милетино и Челопек, денес повторно се градат куќи, а во минатото овде се наоѓало историско село Млаки. Во Челопек беа фотографирани две селски училишта, пошта, како и две селски џамии. Како за крај на експедицијата, нашиот тим го посети општинското средиште Брвеница, во кое покрај бројните општествени објекти, имаше и две селски цркви кои исто така беа фотографирани, а во соседеното село Долно Седларце беа фотографирани подрачното училиште и селската црква, кои се наоѓаат во непосредна близина.

Оваа четврта викиекспедиција не само што ја надополни Википедија со вредни информации, туку и создаде база на фотографии и податоци кои ќе бидат корисни за идните генерации. Со секоја нова експедиција, тимот на Викимедија МКД ги зајакнува врските меѓу историјата, културата и современото општество, инспирирајќи ја јавноста да го цени и чува богатството на Македонија.

Макпортрет 2024 беше фотографски натпревар кој се одржуваше од 15 октомври до 15 ноември 2024 година и чија главна цел беше да се соберат фотографии од личности од Македонија што се занимаваат со култура, наука, просвета, уметност, музика, спорт, телевизија, политика, медицина и други полиња. Овој настан го организираше Викимедија МКД, со цел обезбедување на слободни фотографии на значајни македонски современи дејци.

Учесниците, односно натпреварувачите, како автори на фотографиите требаше да ги прикачуваат на Заедничката ризницата на Викимедија под слободна лиценца, за во иднина тие фотографии да бидат користени за подобра илустрација во статиите на Википедија, како и за другите слободни проекти поврзани со Википедија.

Овој фотографски натпревар се покажа како доста успешен. Учествуваа 14 корисници и беа подигнати вкупно 867 фотографии. Жири од 4 корисници ги прогласи победниците кои освоија вредносни ваучери од  Pix+ и тоа:

• Прва награда – вредносен ваучер од 400 евра-  Корисник: NickyMKD
• Втора награда – вредносен ваучер од 300 евра-  Корисник: Aleksandar Ristovski1
• Трета награда – вредносен ваучер од 100 евра- Корисник: MilenaStanishkovska

Покрај овие награди беше предвидена и следнава награда:

• Најдобро оценетата фотографија според оценките на стручното жири е фотографијата направена од Бени Шаќири, фотографиранa од  Корисник: Aleksandar Ristovski1 – вредносен ваучер  од 200 евра.

Им честитаме на победниците, а на останатите ви благодариме за вашето учество. Вашиот кадар стана дел од трајното наследство достапно за сите нас!

Уредувачките маратони, натпревари, како и уредувачките денови и викенди, претставуваат креативни и едукативни активности кои Викимедија МКД со големо задоволство ги организира. Главната цел на овие настани е збогатување на содржината на Википедија на македонски јазик, како и намалување на содржинските јазови во различни области. Овие активности ги инспирираат учесниците да продолжат со нивниот придонес кон слободното знаење, создавајќи вредност која останува трајна за сите корисници на енциклопедијата.

По повод Светскиот ден на планините, кој се одбележува секоја година на 11 декември, Викимедија МКД организираше уредувачки маратон. Настанот вклучуваше работилница со предавање, проследено со уредувачки маратон на тема „Планини“. Во него учествуваа членови од Вики клубот Скопје, составен од ученици од гимназијата „Јосип Броз – Тито“ под раководство на координаторката Ирена Трајковска Стерјовска. Со својот ентузијазам и труд, седум ученици дадоа значаен придонес кон збогатување на содржината на Википедија на македонски јазик.

Првиот дел од настанот беше резевиран за планинарот Игор Делов, кој беше поканет да се обрати пред присутните и да даде свој поглед кон планинарството и значењето на планините. Важноста на планините и нивната заштита беше особено потенцирана од Делов, кој потоа го презентира алпинизмот, придобивките од спортувањето и бенефитот кој може да се добие од овој вид на спорт. Дополнително, учесниците се запознаа со опремата за овој вид на спорт, како и соодветните мерки за безбедност и заштита при планинарењето.

По предавањето следеше заедничко уредување на тема „Планини“. Учесниците, потпомогнати од организаторите, уредуваа, подобруваа и објавуваа статии на Википедија на македонски јазик. Вкупно беа објавени 15 нови статии.

Преку фотографскиот материјал ви прикажуваме дел од атмосферата на овој настан.

Геокспедициите имаат за цел да помогнат во подобрување на постоечките и создавање на нови статии за засебните и специфични географски области, предели и особености низ целата територија на Македонија. За оваа година Викимедија МКД имаше предвидено две геокспедиции.

По одржаната прва геокспедиција во февруари, втората геокспедиција за оваа година се одржа на 24 ноември 2024 година и тимот на искусни википедијанци го посети природниот феномен „Кукуље”. Оваа месност се наоѓа во Општина Делчево и иако на самите табли на локалитетот се користи називот природна реткост, сепак официјално месноста не е прогласена за таква, бидејќи  општината треба да изготви за истото посебен елаборат. Оваа природна реткост е толку непромовирана што дури ни нашата Википедија нема статија за неа. Тоа беше дополнителен предизвик и стимул за нашиот тим да ја истражи оваа локација.

За да дојдете до оваа месност треба да пристигнете во селото Нов Истевник, кое нашиот тим веќе го имаше посетено во рамки на проектот „Викиекспедиции“ во 2018 година. Откако тимот на истражувачи се исклучи од регионалниот пат кон главниот дел од селото, најпрвин се упати да ја фотографира селската црква „Св. Димитриј“, од која нашиот тим немаше претходни фотографии. Црквата за жал повеќе не постои, бидејќи целосно изгорела во текот на 2021 година и од нејзе се останати само остатоци. До црквата се наоѓаат селските гробишта и трпезарија, која е обновена во понов период.

Од црквата, тимот дојде до сретсело, од каде води пешачката патека до месноста „Кукуље“ во времетраење од триесетина минути. Патеката е делумно уништена и не е целосно означена поради шумските пожари во 2021 година во околината, па доколку сакате самите да го истражувате овој регион најдобро е да се водите по спортските апликации за планинарење или сателитските снимки. Месноста „Кукуље“ некогаш била уредена и таму се наоѓаат клупи и летниковци, како и информативни табли, а воедно е поставена и заштитна ограда над месноста. Оваа појава на ерозивни форми има научно објаснување, но месното население има легенди за тоа како настанале, слично како кај Куклици.

Истражувањето на природниот феномен „Кукуље” беше воедно и последна геокспедиција за 2024 година. Нашиот тим ќе продолжи и во иднина со истражување, фотографирање и во подобрување на постоечките и создавање на нови статии за засебните и специфични географски области, а со тоа вас ве потикнуваме да се запознаете за значењето на природата и наследството што таа ни го оставила.

Викиекспедициите се покажаа како еден од најуспешните проекти на Викимедија МКД, со значителен придонес во истражувањето на македонските предели и збогатувањето на содржините на Википедија. Овој проект има за цел да го документира и популаризира културното и природното наследство на Македонија преку подобрување на постоечките статии и создавање нови за градови, села, географски подрачја и карактеристични обележја од сите региони на државата.

На 21 јули 2024 година, нашиот тим на Википедијанци ја спроведе третата Викиекспедиција за оваа година. Овојпат, фокусот беше насочен кон истражувањето на Тетовскиот регион, кој е богат со историја, природни убавини и културни објекти.

Поради близината на Тетово и селата околу него, тимот на википедијанци тргна во раните утрински часови на 21 јули и најпрвин се упати кон високите планинските делови. Така, најпрвин беше посетено селото Бозовце.  Од Бозовце, истражувачите се упатиja кон Вешала, од каде претходно немаше никакви слободни фотографии. Покрај истражените работи за кои тимот знаеше претходно да ги фотографира, во селото имаше споменик од НОБ. По Вешала, следеше селото Бродец, каде беа фотографирани селската џамија и основното училиште. Потоа следеше поранешното општинско седиште Шипковица, кое имаше бројни општествени објекти, како и две селски џамии.

Од Шипковица, тимот се упати кон скијачкиот центар Попова Шапка, бидејќи истиот припаѓа на атарот на селото Лисец и со тоа претставува негов дел. Пред да се стигне до Попова Шапка, истражувачите влегоа и во самото село Лисец. Тука беа направени фотографии, а потоа и мала пауза во манастирот „Св. Ѓорѓи“ над селото Мала Речица.

По ова, тимот повторно се упати кон планинскиот дел, односно кон селото Вејце, а од од Вејце  се спуштија во Селце, во кое поради неговата поставеност претставуваше предизвик да се влезе и да се дојде до селската џамија и основното училиште. По него, беше посетено селото Лавце, каде се наоѓа Тетовското кале и кое има две цркви и една џамија.

Кога  тимот повторно дојде до градот, се упати на север во селото Ѓермо, планинско село до кое има асфалтен пат, како и основно училиште и селска џамија. Од Ѓермо, беа посетени македонските села Једоарце, Отуње и Сетоле, во кои селските цркви беа пронајдени релативно лесно, бидејќи се веднаш покрај асфалтниот пат.

Оваа Викиекспедиција не само што ги документираше убавините на Тетовскиот регион, туку и значително ја збогати Википедија со нови фотографии и податоци за селата, црквите, џамиите и другите обележја од овој дел на Македонија. Ова е уште еден успешен чекор во мисијата на Викимедија МКД за зачувување и споделување на македонското културно и природно богатство.

Програмата „ГЛАМ“ на Викимедија МКД е една од трите главни програми на организацијата, покрај програмата за образование и програмата за заедница. ГЛАМ е всушност англиски акроним за галерии (galleries), библиотеки (libraries), архиви (archives) и музеи (museums) и подразбира соработка, делување и спроведување активности во тесно партнерство во институции од овој вид. Ваквата соработка подразбира активности од различен вид, како што се работилници на зададена тема, обука на кадар од институциите за користење на Википедија, уредувачки сесии за збогатување на содржините на Википедија и нејзините сродни проекти, испраќање матичен Википедијанец кој би бил врска помеѓу институцијата и здружението и кој активно ќе ја подобрува содржината на Википедија и нејзините сродни проекти.

Мотивирани од ваквите цели, на 6 декември 2024 година во амфитеатарот на градската библиотека „Браќа Миладиновци“ ,членови на Викимедија МКД одржаа конференција со работен наслов „Напредно уредување на Википедија“ наменет за вработени лица во музеи, библиотеки, галерии и архиви. Ова е прва од ваков вид одржана во Македонија, а воедно и прва наменска конференција од ваков тип во организација на Викимедија МКД во тесна соработка со ГБ „Браќа Миладинови“ – Скопје. Конференцијата, покрај теоретскиот дел и предавња, вклучи и обука на кадар од овие институции за користење на Википедија и давање нивен придонес кон развојот на енциклопедијата. Конференцијата беше посетена од 30 учесници од различни институции.

По воведното обраќање на претседателот на Здружението Николче Стојаноски и неговото потенцирање за важноста на соработката со овие институции за добивање на цврсти и веродостојни слободни содржини, се обрати и извршниот директор на Викимедија МКД,  Снежана Штрковска. Нејзиниот осврт беше насочен кон тоа што е Википедија и како треба да изледа една солидна, доброверифицирана статија од енциклопедиски стил. По практичната едночасовна обука овозможена за присутните 30 учесници, излагање имаше и претставник на Викимедија Србија која исто така ја потенцираше важноста на овие институции за слободното знаење. Крајниот дел беше резервиран за Ана Вишинова, ГЛАМ координатор, која го преслика своето искуство и историскиот развој и значење на ГЛАМ програмата на Викимедија МКД.

Важноста од создавање на слободни содржини и дигитализација на материјали, документи, и културно-историско наследство беше препознаена од сите учесници на конференцијата. Различниот профил на учесници, кои всушност застапуваа институции од ваков тип, само ја потврди сплотеноста на дел од културните работници за соработка со Викимедија МКД и реализирање проекти од ваков вид.

Фотографскиот материјал од настанот можете да го погледнете на следнава врска.

Во современото образование, сè повеќе значење се посветува на иновациите и интерактивните методи за учење, кои не само што ги поттикнуваат учениците да стекнат нови знаења, туку и ги мотивираат да бидат креативни и активни учесници во процесот на образование. Во оваа насока, особено внимание се посветува на иницијативите кои промовираат слободно знаење и користење на современите технологии како алатка за едукација.

Еден од највпечатливите примери за ваква посветеност е работата на Александра Шундовски, наставник во ООУ „Гоце Делчев“ во Демир Хисар. Таа со огромен ентузијазам и посветеност го води Вики клубот во својот град – иницијатива чија цел е збогатување на слободното знаење на македонски јазик преку создавање и уредување на содржини на Википедија.

Во интервјуто за Викимедија МКД, Александра ги споделува своите искуства, мотивацијата, како и влијанието на овој проект врз учениците. Таа говори за предизвиците и можностите кои ги носи оваа иницијатива, но и за огромните придобивки од ваквиот пристап кон едукацијата, како за учениците, така и за наставниците.

ВМ МКД: Колку време го водите Вики клубот во Демир Хисар и што ве мотивираше да почнете да се занимавате со овој проект?

• Александра Шундовски: Вики клубот во Демир Хисар го водам веќе 3 месеци. Од самиот почеток, мотивирана бев од извршната директорка на Викимедија МКД, Снежана Штрковска, која ми го претстави значењето на овој проект за Википедија на македонски јазик. Идејата дека можеме заеднички да го збогатиме знаењето на нашиот јазик преку креирање нови статии, како и можноста да им помогнеме на учениците да се запознаат со значењето на слободните информации, беа главните фактори што ме инспирираа да се вклучам. Сметам дека преку вакви проекти можеме да направиме значителен придонес за заедницата, но и да ги мотивираме младите да учат и да истражуваат.

ВМ МКД: Кои се најголемите придобивки што ги гледате од водење на Вики клубот?

• Александра Шундовски: Најголемата придобивка од водењето на овој клуб е директната работа со учениците и нивната лична и професионална надградба. Преку овој проект, тие стекнуваат вредни вештини, како што се истражување, критичко размислување, уредување и преведување. Овие вештини не само што им помагаат во нивното моментално образование, туку и ги подготвуваат за предизвиците во иднината. Освен тоа, гледам како се зголемува нивната самодоверба и интерес за теми кои претходно можеби не ги разгледувале. Оваа промена кај учениците е навистина инспиративна и ме поттикнува да продолжам со мојата работа.

ВМ МКД: Какво влијание сметате дека Вики клубот има врз учениците?

• Александра Шундовски:  Влијанието на Вики клубот врз учениците е многу позитивно. Преку активното учество, тие не само што учат како да создаваат нови содржини за Википедија, туку и се запознаваат со важноста на точноста и објективноста на информациите. Забележувам дека со секоја нова задача стануваат сè попосветени и поорганизирани. Овој процес не само што ги едуцира, туку и ги мотивира да бидат креативни и проактивни во секојдневниот живот.

ВМ МКД: Што би им препорачале на наставниците кои размислуваат да се вклучат во водење на Вики клуб или ваше размислување за крај?

• Александра Шундовски: На сите наставници кои размислуваат да се вклучат во водење на Вики клуб би им препорачала да се охрабрат и да го направат првиот чекор. Ова е уникатна можност да се биде дел од проект кој ги збогатува не само учениците, туку и наставниците. Работата со младите носи голема сатисфакција, а нивниот напредок е најголемата награда. Секој што ќе се вклучи ќе има шанса да учи, да истражува и да го споделува своето знаење на еден нов, модерен начин. Моето размислување за крај е дека ваквите проекти се иднината на образованието – тие не само што го развиваат знаењето, туку создаваат генерации кои се подготвени за дигиталната ера. Верувам дека и наставниците и учениците ќе се надоградуваат професионално и лично, и затоа треба да продолжиме со љубов и посветеност.

Истражете го светот на волонтерството и создавањето на слободни содржини за целата поширока македонска јавност. Приклучете се во активностите на Викимедија МКД и запознајте се со сосема нов академско-образовен свет. Доколку сте заинтересирани контактирајте нè на тел број: 078 455 549 или на obrazovanie@wikimedia.mk

Збогатувањето на содржината на Википедија и нејзините сродни проекти со слободни содржини достапни за секого е примарната цел на целата заедница на Викимедија МКД. Преку здружување на волонтерските сили сите активни членови на Викимедија МКД се стремат да постигнат што поголеми резултати и успеси. Викимедија МКД токму тоа ја води напред, заедничка визија и стремеж кон целта.

Конференциите кои ги одржува Википедија МКД секогаш имаат за цел да обучат сè повеќе луѓе да уредуваат на Википедија и да станат дел од оваа глобална платформа на знаење. Преку Вики клубовите, кои веќе подолго време успешно функционираат, уредувачите се обучуваат да создаваат и подобруваат статии на Википедија на македонски јазик, придонесувајќи кон збогатувањето на дигиталната библиотека на слободни информации.

Еден од поактивните Вики клубови на Викимедија МКД е Вики клубот во Велес, кој не само што привлекува ученици, туку и активно го ангажира повозрасното население преку Вики клубот Сениор. Овие клубови функционираат како двигатели на локалната иницијатива за уредување на Википедија.

На 28 ноември 2024 година, во Градската библиотека „Гоце Делчев“ во Велес, се одржа конференција за напредно уредување на Википедија. Оваа конференција беше наменета за членовите на Вики клубот Сениор и на него беа пристуни 10 учесници. Конференцијата ја отвори Снежана Штрковска, извршен директор на Викимедија МКД, која ги запозна присутните со основите на функционирањето на Википедија. Таа ги истакна придобивките од употребата на Википедија како едукативно и информативно средство, нагласувајќи ја важноста на точноста и проверливоста на информациите. Понатаму, зборуваше Лили Арсова, координаторка на Вики клуб Велес, која се осврна на етичките аспекти на уредувањето, потенцирајќи ја одговорноста на уредувачите при создавањето на содржини.

По кратката пауза се обрати Боса Филиповиќ, менаџер за образовна програма на Викимедија МКД, која детално ги објасни најчестите грешки што се прават при уредувањето и ги презентираше основните принципи на Википедија. Јован Тасевски кој е менаџер за заедница на Викимедија МКД, зборуваше за правилното користење на извори, цитати и внатрешни врски при пишувањето на статии. Семинарот заврши со излагањето на Бојан Велковски, менаџер за комуникации на Викимедија МКД, кој зборуваше за тоа како се поставуваат слики на Заедничката ризница, но зборуваше и за авторските права на фотографиите кои се поставуваат, за правниот аспект на авторските права и како правилно се поставуваат фотографии во статиите.

Конференцијата помина во одлична атмосфера. Присутните кои веќе имаа почетно знаење од уредувањето на Википедија беа задоволни од новите работи кои ги научија. Тимот на Викимедија МКД останува и во иднина посветен да го пришири и обучи тимот на волонтери кои придонесуваат за најголемата семрежна енциклопедија Википедија и да го зголеми пристапот до слободно знаење за сите.

Фотографскиот материјал од настанот може да го погледнете на следнава врска.

Во денешниот свет, исполнет со брзи промени и нови технологии, образованието станува повеќе од обичен пренос на знаења. Се појавуваат нови платформи и начини на учење кои не само што го зголемуваат знаењето на учениците, туку и ги учат на практични вештини кои ќе им бидат корисни низ целиот живот. Еден таков проект е Вики клубот, иницијатива која ги ангажира младите умови да станат активни учесници во создавањето и збогатувањето на содржините на Википедија на македонски јазик. Овој клуб е место каде што младите, под водство на посветени наставници се вклучуваат во волонтерска работа која е од непроценлива вредност за македонската образовна и културна сцена.

Наташа Неданоска, професорка во ООУ „Кочо Рацин” во Охрид е поддржувач на оваа иницијатива која ја гледа како можност да им пренесе на своите ученици знаења за пишување статии, критичко размислување, информации и истрајност. Таа во интервју за Викимедија МКД изјави дека за да се вклучи во Википедија била водена од длабок патриотизам и желба да го збогатува знаењето на македонски јазик. Со текот на времето, нејзината мотивација растела и се развивала, и решила да го пренесе  ова знаење на новите генерации, на учениците.

ВМ МКД: Што ве привлече за да се вклучите и да водите Вики клуб и што ве мотивираше да почнете да се занимавате со овој проект?

• Наташа Неданоска: Во нашето училиште Вики клуб постои над 12 години т.е. откако сум јас вработена во него! Знаењето што го понесов од првиот вебинар за уредување на Википедија на македонски јазик и искуствата што ги стекнав како професор во средно училиште, водејќи и таму Вики клуб, ги пренесов во моето сега матично училиште. Првичниот мотив беше силно родољубив, да се збогатува Википедија на македонски јазик. Базичниот мотив остана, но се родија уште многу други, но еден од поважните беше и сè уште е- да го пренесувам своето знаење за уредување на идните генерации, да оспособувам ученици да уредуваат на Википедија.

ВМ МКД: Кои се најголемите придобивки што ги гледате од водење на Вики клубот?

• Наташа Неданоска: Самото име, Вики клуб, кажува дека станува збор за дружба, за чувство на припадност, за развивање на еден друг тип на пријателства. За мене ова е еден корисен волонтеризам, чувство на правење добро дело, навидум невидлив придонес кон заедницата кој има повеќеслојни придобивки- паметно искористено време, користење на знаењата и ресурсите во добри цели, практикување новинарство и објективно расудување, одговорност кон сработеното и многу други.

ВМ МКД: Какво влијание сметате дека Вики клубот има врз учениците?

• Наташа Неданоска: Човек најповеќе ужива во она што сам ќе го сработи, па така и кај учениците се раѓа чувство на задоволство кога нешто повеќе научиле, а при тоа и нешто повеќе од очекуваното сработиле. Тука суптилно се провлекува влијанието на македонскиот јазик и ненаметливото јакнење на родољубието. Учениците стануваат посвесни и поодговорни, стануваат поемпатични и поистрајни.

ВМ МКД: Што би им препорачале на наставниците кои размислуваат да се вклучат во водење на Вики клуб или ваше размислување за крај?

• Наташа Неданоска: Ги охрабрувам наставниците да земат учество во караванот семинари за наставници за уредување на Википедија на македонски јазик и вовед во образовниот систем. Оттука, со споделување на лични примери и успеси на координаторите на Вики клубовите ширум земјава, ќе добијат инспирација и тие да станат дел од оваа успешна заедница. Што и да започнат, не се сами, тука е поддршката од тимот која несебично се вложува во секој од нас. Понатаму, се отвараат нови видици и уредувачки хоризонти. Ве очекуваме 😊

Истражете го светот на волонтерството и создавањето на слободни содржини за целата поширока македонска јавност. Приклучете се во активностите на Викимедија МКД и запознајте се со сосема нов академско-образовен свет. Доколку сте заинтересирани контактирајте нè на тел број: 078 455 549 или на obrazovanie@wikimedia.mk