admin

Образовната програма на Викимедија МКД претставува важен мост меѓу формалното образование и слободното знаење. Преку Вики клубовите во училиштата ширум државата, учениците добиваат можност активно да учествуваат во создавање и споделување квалитетни, проверени и слободно достапни информации на македонски јазик. Овие клубови не се само место за учење на технички вештини, туку и простор за развој на критичко размислување, дигитална писменост, одговорност и тимска работа.

Еден од ваквите успешни примери е Вики клубот во Штип, кој со посветеност и ентузијазам веќе неколку години го води професорката Љиљана Манова. Преку нејзината работа, учениците се охрабруваат да станат активни создавачи на знаење и свесни учесници во дигиталното општество.

ВМ МКД: Колку години го водите Вики клубот во вашето училиште и што ве мотивираше да започнете со овој проект?

Љиљана Манова: Вики клубот во нашето училиште успешно го водам веќе четири години, односно од 2021 година до денес. Основниот мотив беше мојата желба да им помогнам на учениците да станат активни создавачи на знаење, а не само негови корисници. Дополнителна мотивација ми беше и личното задоволство – чувството кога ќе видите како учениците напредуваат, стануваат посигурни, пољубопитни и посвесни за својата улога во дигиталниот свет.

ВМ МКД: Кои се најголемите придобивки што ги гледате од водењето на Вики клубот?

Љиљана Манова: Придобивките од водењето на Вики клубот се навистина многубројни, како за учениците, така и за мене како ментор. Клубот претставува средина во која сите учиме, растеме и се развиваме заедно.

ВМ МКД: Какво влијание сметате дека Вики клубот има врз учениците?

Љиљана Манова: Преку активностите во Вики клубот, учениците учат како да истражуваат, да проверуваат информации и да создаваат статии кои се јавно достапни и корисни за пошироката јавност. Кај нив се развиваат вештините за писмено изразување, се јакне самодовербата и мотивацијата, како и чувството дека нивниот труд има вистинско значење.

Од друга страна, за мене како ментор, ова искуство значи унапредување на моите менторски и организациски вештини, како и големо лично задоволство од придонесот кон образованието и заедницата. Накратко, водењето на Вики клубот претставува инвестирање во знаењето, вредностите и иднината на учениците, но и во сопствениот професионален развој.

Вики клубот создава самостојни, одговорни и ангажирани млади луѓе, подготвени за предизвиците на дигиталното општество. Тоа вклучува развој на социјалните вештини, јакнење на дигиталната писменост, како и унапредување на правописот и јазичното изразување.

ВМ МКД: Кои се вашите идни планови за Вики клубот?

Љиљана Манова: Моите идни планови се насочени кон мотивирање и вклучување на поголем број ученици, со цел Вики клубот да прерасне во уште поширок простор за учење, соработка и отворена средина достапна за сите.

ВМ МКД: Што би им препорачале на наставниците кои размислуваат да се вклучат во водење на Вики клуб?

Љиљана Манова: На наставниците кои размислуваат да се вклучат во водење на Вики клуб би им препорачала со ентузијазам да го прифатат ова искуство и да ги поврзат вики-активностите со наставните содржини. Вики клубот не е само воннаставна активност, туку моќна алатка која ги подготвува учениците за современиот дигитален свет.

Истражете го светот на волонтерството и создавањето на слободни содржини за целата поширока македонска јавност. Приклучете се во активностите на Викимедија МКД и запознајте се со сосема нов академско-образовен свет. Доколку сте заинтересирани контактирајте нè на тел број: 078 455 549 или на obrazovanie@wikimedia.mk

Викимедија претставува глобално движење посветено на создавање, споделување и слободен пристап до знаење за сите. Преку своите проекти, како што се Википедија, Викимедија Ризница, Википодатоци и други сестрински проекти, Викимедија нуди богати и проверливи образовни ресурси кои можат успешно да се користат како наставно средство во формалното и неформалното образование. Овие платформи овозможуваат наставниците и учениците активно да учествуваат во создавањето на содржини, да развиваат дигитална писменост и критичко размислување, како и да ја поттикнуваат културата на слободно знаење.

Интеграцијата на проектите на Викимедија во наставниот процес придонесува кон унапредување на наставата, поголема ангажираност на учениците и користење на современи дигитални алатки во согласност со образовните потреби на денешното општество. Преку образовните програми на Викимедија МКД, наставниците добиваат поддршка, обуки и ресурси за практична примена на слободните образовни содржини во својата секојдневна работа.

На 16 декември 2025 година, во ООУ „Браќа Миладиновци“ во село Миладиновци, Скопје, се одржа конференција за наставници, на која присуствуваа  27 професори од училиштето. Конференцијата беше организирана со цел да се претстават можностите што ги нуди Википедија во образованието, како и да се поттикне соработката помеѓу наставниците и Викимедија МКД.

Конференцијата започна во 12 часот во просториите на училиштето. На почетокот се обрати Боса Филиповиќ, менаџер за образовна програма, која ги претстави образовните активности, програмите и можностите за вклучување на наставниците. Снежана Штрковска, извршен директор на Викимедија МКД, одржа предавање за мисијата и визијата на организацијата и нејзината улога во унапредувањето на образованието, како и  за самата енциклопедија, како функционира Википедија, кои се придобивките од употребата на Википедија како наставно средство и како правилно да се користи Википедија како информативен извор за точни и потврдени информации.  На конференцијата се обрати и Ана Вишинова, ГЛАМ координатор, која се осврна на значењето на соработката со културни и образовни институции и на потенцијалот на ГЛАМ програмата.

Во текот на конференцијата беа презентирани конкретни примери на користење на Википедија и другите проекти на Викимедија во наставата, како и успешни практики од образовниот процес. Наставниците имаа можност да поставуваат прашања, да дискутираат за предизвиците со кои се соочуваат во наставата и да разменат идеи за понатамошна соработка и примена на слободните образовни ресурси.

Ваквите активности ја потврдуваат важноста на Википедија како релевантен и доверлив ресурс во образованието. Примената на слободните образовни содржини во наставниот процес придонесува кон развој на дигитални вештини кај учениците, како и кон унапредување на наставната практика. Викимедија МКД продолжува да гради партнерства со образовните институции и наставниот кадар, со цел поттикнување на отворено, квалитетно и достапно знаење за сите.

Фотографскиот материјал од настанот може да го погледнете на следнава врска.

Фотографскиот натпревар „Вики ја сака храната“, организиран од Викимедија МКД беше дел од меѓународната иницијатива „Wiki Loves Food“, чија главна цел е збогатување на Википедија и нејзините сродни проекти со квалитетни, слободни фотографии од храна и јадења од различни култури. Натпреварот привлече голем број учесници кои со своите фотографии ја прикажаа разновидноста на традиционалната и современата кујна, локалните специјалитети и воопшто храна од целиот свет. Со ова, уште еднаш се покажа дека фотографијата може да биде моќна алатка за документирање и споделување на културното наследство.

Учествуваа вкупно 13 корисници, а како резултат на нивниот придонес, на Заедничката ризница беа подигнати вкупно 1299 фотографии, кои се објавени под слободна лиценца и се достапни за користење во статии на Википедија на македонски и на други јазици, како и на останатите проекти на Викимедија. Овие фотографии претставуваат значајно визуелно збогатување на енциклопедиските содржини и придонесуваат кон подобро разбирање и презентација на темите поврзани со храната и гастрономијата.

Дел од поставените фотографии веќе се искористени за илустрирање на постојни статии, додека други ќе послужат како основа за создавање нови статии или проширување на веќе постоечки содржини на Википедија. На овој начин, натпреварот директно придонесува кон зголемување на квалитетот и визуелната привлечност на слободното знаење.

По завршувањето на натпреварот, стручно жири ги разгледа сите пристигнати фотографии и ги оцени според утврдените критериуми, како што се квалитетот на фотографијата и бројноста и разновидноста на прикажаната храна. Па така, добитниците на  вредносни ваучери од Pix+ се:

• Прва награда– за најголем број различни видови храна, традиционални јадења и специјалитети: Sentimentalna –  ваучер во бруто-износ од 400 евра
• Втора награда– за бројност и разновидност:Тиверополник – ваучер во бруто-износ од 300 евра
• Трета награда– за бројност и разновидност: Viktorija N. Ivanov – ваучер во бруто-износ од 100 евра
• Награда за највисоко оценета фотографија – MartinSamarov  со фотографијата „Традиционален македонски пинџур со везена пиперка“ – ваучер во бруто-износ од 200 евра

Фотографскиот натпревар „Вики ја сака храната“ уште еднаш ја истакна важноста на волонтерскиот придонес во развојот на слободното знаење. Преку вакви иницијативи, Викимедија МКД продолжува да ги мотивира граѓаните активно да учествуваат во создавањето и збогатувањето на Википедија, како и да ја препознаат вредноста на слободните лиценци и отвореното споделување на содржини.

Викимедија МКД упатува искрена благодарност до сите учесници кои одвоија време и труд да придонесат со свои фотографии, како и до членовите на жири-комисијата за нивната посветеност и професионална евалуација. Благодарение на заедничкиот ангажман, Википедија е збогатена со нови визуелни содржини кои ќе им служат на читателите ширум светот.

Вики камповите на Викимедија МКД претставуваат едни од најинспиративни активности во рамките на образовната програма на здружението. Тие се место каде што младите љубители на знаењето, технологијата и културата се собираат за да учат, да создавaт и да соработуваат. Во атмосфера исполнета со тимска работа, ентузијазам и желба за придонес кон слободното знаење, вики камповите веќе седум години претставуваат силен двигател за градење на нови генерации активни википедијанци.

Од 5 до 7 декември 2025 година, по седми пат, Викимедија МКД го организираше годишниот вики камп– тридневен собир на ученици, членови на вики клубовите од повеќе градови низ Македонија. Овие млади ентузијасти, дел од образовната програма на здружението, повторно ги здружија своите сили за да создадат нови содржини на македонски јазик на слободната интернет-енциклопедија.

Локацијата на овогодинешниот камп беше хотелот „Арена“ на Попова Шапка, место што им овозможи на учесниците истовремено продуктивна, поттикнувачка и пријатна работна атмосфера. Во духот на соработка, дружење и меѓусебна поддршка, 43 учесници ги поминаа трите дена создавајќи статии, разменувајќи знаење и градeјќи вештини за критичко и слободно информирање. Овој камп останува единствен настан од ваков вид во земјава посветен токму на младите љубители на знаење.

Како и секоја година, кампот беше тематски. Тема на ова издание беше „Занаети во светот“ – избор кој им овозможи на учесниците да навлезат во богатата традиција, разновидност и значење на занаетчиството во различни култури. Нивната посветеност резултираше со создавање 243 нови статии на македонски јазик, со што значително се збогати содржината на Википедија и се отвори простор за нови знаења. Најдобрите 5 ученици кои напишаа најмногу статии, добија вредни награди-смарт часовници од Викимедија МКД.

Покрај практичната работа, кампот имаше и силен едукативен карактер. Учесниците присуствуваа на предавања, дискусии и работилници, преку кои не само што ги унапредија своите вики-вештини, туку стекнаа и подлабоки сознанија за занаетите како дел од светското културно наследство. Предавања одржаа м-р Ненад Шундовски, Орце Нинески-координатор на ГЛАМ програмата на Викимедија МКД, како и Лили Арсова, координатор на Вики клуб Велес. Свои обраќања имаа и претседателот на здружението, м-р Николче Стојаноски, како и извршната директорка на Викимедија МКД, Снежана Штрковска.

На крајот, вики кампот уште еднаш покажа дека кога младите се здружени околу идејата за слободно знаење, резултатите се импресивни и трајни. Настанот остави силен печат, поттикнувајќи ги учесниците и понатаму да создаваат и го градат дигиталниот свет како место достапно за сите. Викимедија МКД со гордост продолжува да ја одржува оваа традиција, градејќи заедница што верува во моќта на знаењето – слободно, отворено и споделено.

Фотографскиот материјал од настанот може да го погледнете на следнава врска.

 

Викимедија МКД продолжува со традицијата на организирање уредувачки маратони со кои се поттикнува создавањето и унапредувањето на слободната содржина на македонски јазик. Овие натпревари претставуваат можност сите љубители на знаењето – било да се почетници или искусни уредувачи – да придонесат во збогатување на Википедија, истовремено натпреварувајќи се за вредни награди.

Па така уредувачкиот натпревар на тема „Митологија“, се одржува во периодот од 29 ноември до 28 декември 2025 година. Целта на натпреварот е да се поттикне создавање квалитетни и проверливи статии поврзани со митологиите од целиот свет – антички, народни, религиски, регионални и современи митолошки системи.

Цел на натпреварот

Митологијата претставува значаен дел од културното и духовното наследство на човештвото. Преку овој натпревар сакаме да се прошири и продлабочи содржината на Википедија на македонски јазик во оваа област, со создавање или подобрување на статии кои обработуваат:

• митови и легенди
• богови, божества и херои
• митолошки суштества и симболи
• митолошки места, предмети и концепти
• историски извори и традиции поврзани со митолошки наративи

Особено се охрабрува создавање статии од општа, интернационална и научна важност.

Во натпреварот може да учествува секој регистриран корисник на Википедија на македонски јазик, освен членовите на оценувачкиот одбор. Учесниците можат да креираат нови статии или да ги уредуваат, прошируваат и подобруваат постоечките, сè додека придонесите се нивни сопствени и усогласени со правилата на Википедија.

Какви статии се прифатливи?

Во натпреварот влегуваат статии што се директно поврзани со митологија, без оглед на потеклото или културата.
Не се прифаќаат содржини за уметнички дела (филмови, серии, книги, игри) кои само користат митолошки мотиви – освен ако не се обработува нивната историска или митолошка основа.

Сите статии треба да бидат:

• добро напишани и енциклопедиски
• со наведени извори
• без машински преводи без учесникот да вложи напори за нејзино средување
• структуирани според стандарди на Википедија

Статиите ќе ги прегледува Оценувачки одбор којшто ќе биде составен од тројца википедијанци кои не можат да учествуваат на натпреварот. Оценувачкиот одбор ќе ја донесе конечната одлука за победникот. Членовите на оценувачкиот одбор ќе ги прегледаат сите статии и секоја ќе ја бодуваат поединечно со бодови од 1 до 10.

Награди

За најуспешните учесници се обезбедени вредни награди во форма на вредносни ваучери:

• I награда – 12.000 денари
• II награда – 6.000 денари
• III награда – 3.000 денари

Дополнителни награди:

• Награда за најдобра статија – 5.000 денари
• Награда за најдобар нов учесник – 2.000 денари

Со овој натпревар сакаме да ги поттикнеме љубителите на митологијата, ентузијастите и сите подготвени да придонесат кон слободното знаење, да се вклучат и да помогнат во збогатувањето на Википедија на македонски јазик со нови, квалитетни и добро проверени информации. Учеството е отворено и едноставно, а секој придонес има значење за заедницата и за развојот на енциклопедијата.

Ги охрабруваме сите заинтересирани да се приклучат, да создаваат и да споделуваат знаење, а воедно да ја почувствуваат динамиката и духот на вики-заедницата. Придружете ни се во овој уредувачки натпревар и дадете свој придонес во оформувањето на богата и достапна база на информации од митологијата на светот.

Проектот „Викиексперименти“ веќе цела деценија претставува важна алка во популаризацијата на науката и достапноста на научните содржини на интернет. Во овие десет години, проектот се развиваше и надградуваше во континуирана соработка со научни институции, истражувачки центри и високообразовни установи ширум Македонија. Благодарение на поддршката од професори, асистенти и научни работници, „Викиексперименти“ успеа да создаде богата база на едукативни видеозаписи кои ги прикажуваат научните експерименти на јасен, визуелно разбирлив и пристапен начин.

Проектот започна во 2015 година со цел да се понудат квалитетни и отворено достапни материјали кои може да се користат во наставата, научната комуникација и самообразованието. Со текот на годините, неговиот опфат значително се прошири – денес видеозаписите покриваат широк спектар научни области, меѓу кои физика, хемија, биологија и други дисциплини. Секој експеримент се снима во стручна соработка со научни кадри од релевантни институции, што гарантира квалитет, точност и научна релевантност.

Сите создадени материјали се подигнуваат на Заедничката ризница на Викимедија – глобалната медиумска библиотека која ги снабдува проектите на Викимедија со бесплатни фотографии, илустрации и видеосодржини. Благодарение на тоа, видеозаписите од „Викиексперименти“ се користат на статии во Википедија на различни јазици, во едукативни презентации, училишни часови, како и во научнопопуларни содржини кои се достапни ширум светот.

Oвој пат на 26.11.2025 година во просториите на Институот за биологија при ПМФ, професорката Сара Цветаноска изведуваше експерименти по биологија од различна прирорда. Притоа, член на тимот на Викимедија МКД со камера со висока резолуција ги снимаше обидите, кои подоцна се доработуваат и прикачуваат на Заедничката ризница. Професорката Цветаноска на мошне вешт начин успеаа да направи експерименти со цел истите да бидат снимени и понатаму употребувани од пошироката публика. Самите видеозаписи може да се употребуваат за образовни цели од различни возрасти, студенти, но и од љубители на биологогијата кои сакаат да ја проучат подлабоко оваа природна наука.

Со влегувањето во десеттата година од своето постоење, проектот продолжува со нови обиди, нови снимања и уште поголема посветеност кон создавање квалитетни научни материјали што се слободно достапни за сите. „Викиексперименти“ останува пример за успешна соработка меѓу академската заедница и отвореното знаење, покажувајќи дека науката може да биде разбирлива, достапна и инспиративна за секој љубопитен ум.

Фотографскиот материјал од настанот може да го погледнете на следнава врска.

Викимедија МКД постојано работи на промовирање и зголемување на слободната содржина на македонски јазик. Еден од начините на кои тоа го прави е преку организирање на уредувачки маратони и натпревари, кои овозможуваат на учесниците не само да придонесуваат кон создавање квалитетна и проверена содржина, туку и да го зголемат своето знаење од разни области. Со различни теми, но со иста цел – поттикнување на создавање и подобрување на статии – овие активности овозможуваат учесниците да ја применат својата креативност, а истовремено и да се натпреваруваат за вредни награди. Овој пат, Викимедија МКД организира уредувачка седмица на тема „Риби“.

Уредувачка седмица „Риби” се одржува од 21 ноември до 27 ноември 2025 година. Овој натпревар има за цел да помогне во подобрување на постоечките и создавање на нови статии на оваа тема.

Сите статии треба да бидат напишани во склад со начелата и правилата на Википедија, па така сите статии треба да бидат напишани на енциклопедиски стил и да бидат поткрепени со соодветни извори. При уредување на натпреварот, или по завршувањето на истиот, сите учесници треба да си го запишат своето корисничко име на проектната страница, заедно со статиите кои ги напишале. Покрај пишувањето на нови статии, учесниците имаат можност и значајно да надополнат некоја постоечка статија.

Во натпреварот имаат можност да учествуваат сите регистрирани корисници на Википедија на македонски јазик, а за најдобрите учесници се обезбедени награди.

Награди ќе им бидат доделени на тројцата најплодотворни учесници во облик на вредносни купони, и тоа:

• Прва награда: купон во вредност од 4.000 денари.
• Втора награда: купон во вредност од 3.000 денари.
• Трета награда: купон во вредност од 2.000 денари.

За да се освои било која награда, потребно е да се создадат или подобрат најмалку 20 статии!

Овој натпревар е одлична можност не само за натпреварување и освојување награди, туку и за практична работа со пишување и уредување, како и за придонес кон збогатување на македонската слободна енциклопедиска содржина. Вашиот придонес ќе биде траен и достапен за сите кои сакаат да учат, а учеството во уредувачката седмица „Риби“ може да биде почеток на долготрајно создавање на квалитетна содржина на Википедија на македонски јазик.

Уредувачките натпревари кои ги организира Викимедија МКД претставуваат еден од најуспешните и највлијателни начини за поттикнување квалитетно создавање содржини на Википедија на македонски јазик. Тие се наменети за сите корисници – од искусни уредувачи до ентузијасти кои сега го започнуваат својот пат на Википедија. Преку овие тематски активности се охрабрува пишувањето и подобрувањето на постојните статии, а воедно се поттикнува и соработката, размената на знаење и развивањето на чувството за заедништво во вики-заедницата.

Со секој нов натпревар, Викимедија МКД настојува да отвори простор за збогатување на содржините во важни и често недоволно обработени области. Токму таков беше и уредувачкиот натпревар на тема „Европска книжевност“, кој им овозможи на учесниците да се нурнат во богатите литературни традиции на европските народи и да придонесат кон создавање и подобрување на статии од оваа значајна област.

Уредувачкиот натпревар на тема „Европска книжевност“ се одржуваше од  13 септември до 12 октомври 2025 година. Главна тема на натпреварот беше европската книжевност и сите статии поврзани со неа беа признаени и бодувани. Темата вклучуваше статии за книжевници, книжевни дела, книжевни правци, но и општи статии за книжевноста во европските земји.

Сите статии требаше да бидат напишани во склад со начелата и правилата на Википедија, па така сите статии требаше да бидат напишани на енциклопедиски стил и да имаат извори.  При уредување на натпреварот или по неговото завршување, сите учесници требаше да се запишат со кои статии учествувале.

На натпреварот можеа да учествуваат сите регистрирани корисници на Википедија на македонски јазик, освен членовите на оценувачкиот одбор. Учествуваа 14 корисници и вкупно беа напишани 302 статии. Најдобрите учесници ги добија следниве награди:

• Прва награда за најдобар уредник –Тиверополник– вредносен купон од 12.000 денари
• Втора награда за најдобар уредник – 19user99– вредносен купон од 6.000 денари

Покрај овие награди беше предвидена и следнава награда:

• Награда за најдобра статија – „Фјодор Достоевски“ од Тиверополник

Им упатуваме искрени честитки на сите добитници, а уште поголема благодарност на сите учесници кои вложија време, знаење и посветеност. Вашите статии претставуваат значаен придонес во развојот на слободното знаење и во промовирањето на богатото европско книжевно наследство.

Продолжуваме заедно да ја градиме поквалитетната, подостапна и побогата Википедија на македонски јазик!

 

Викиекспедициите се теренски активности на заедницата на македонските википедијанци чија цел е документрање на природното, културното и историското наследство на различни подрачја низ Македонија. Преку фотографирање, собирање податоци и разговори со локалното население, учесниците создаваат оригинална содржина што подоцна се користи за збогатување на статиите на Википедија. На овој начин, проектот придонесува кон зачувување на културната меморија и поголема видливост на помалку познатите делови на државата.

Во октомври нашиот тим на википедијанци ја реализираше својата четврта теренска експедиција, овојпат посветена на областите Козјачија и Средорек во Општина Старо Нагоричане. Поради близината на регионот до Скопје, тимот одлучи експедицијата да ја организира во две еднодневни посети – на 11 и 23 октомври, искористувајќи ги државните празници. Целта беше да се документираат селата кои не биле опфатени во претходните експедиции, како и да се дополнат податоците за културното наследство, инфраструктурата и природните карактеристики на овој крај.

Прв дел – 11 октомври

Првиот ден започна со посета на селата околу Кокино. Иако времето беше неповолно и со врнежи, тимот успеа да го реализира поголемиот дел од планираната маршрута. Прво беа документирани објекти во околината на Драгоманце, Челопек и Старо Нагоричане, каде беа направени дронски фотографии од теренот. Потоа следуваа посетите на Добрача каде се наоѓаше црквата „Св. Троица“, позната по украсената фасада.

Тимот продолжи кон Жегљане, Малотино, Кокино и Рамно, каде беа документирани неколку стари училишта, споменици од НОБ и урнати цркви, меѓу кои и срушената црква „Св. Никола“. Во текот на денот беа направени и снимки од селата Цветишница, Буковљане и М’гленце, иако поради ниските облаци и врнежите дел од материјалот беше ограничен.

Во завршницата на првиот дел беа посетени и селата Челопек, Коинце, Алгуња, Враготурце и Пелинце. Беа регистрирани неколку верски објекти, меѓу кои и црквите „Св. Ѓорѓи“, „Св. Петка“ и „Св. Недела“. Денот заврши во Куманово, каде тимот ја заокружи успешната празнична експедиција.

Втор дел – 23 октомври

Вториот дел на експедицијата, реализиран на 23 октомври, беше насочен кон селата долж државниот пат А2 и источниот дел на општината. Иако временските услови повторно беа променливи, тимот успеа да изврши целосна теренска документација.

Посетата започна со селата Војник и Стрезовце, каде беа направени дронски фотографии и беше идентификуван „Шупливиот Камен на Крале Марко“. Потоа следуваа Облавце и Руѓинце, каде беа регистрирани повеќе јавни објекти, меѓу кои училишта и цркви. При снимањето во Руѓинце имаше и инцидент со оштетување на една дронска перка, но активностите продолжија без прекин.

Во селото Орах беа документирани споменици од НОБ и уникатната црква „Св. Никола и Св. Ѓорѓи“,со два влеза и посветена на двата светци. Црквата претставува заштитено културно наследство на Македонија.  Тимот го посети и Карпинскиот манастир, каде беше направена пауза и беше воспоставен пријателски контакт со локалните жители.

Во завршниот дел беа посетени селата Макреш, Канарево, Цвиланце и Бајловце. Во Бајловце беа регистрирани неколку интересни локации, меѓу кои црквата „Св. Димитриј“ и необичниот верски комплекс „Св. Троица“, познат по локалните преданија за лековити камења и лековита вода.

Исход

Со вкупно 16 ново фотографирани села, 6 повторно посетени населени места и поминати над 400 километри тимот имаше одлична викиекспедиција. Собраните фотографии, дронски снимки и белешки ќе придонесат кон збогатување на содржините на Википедија на македонски јазик, со цел подобра видливост и зачувување на културното и природното наследство на североисточна Македонија.

Така, чекор по чекор,  нашиот тим на википедијанци ја испишува современата карта на Македонија – со фотографии, факти и приказни од секој нејзин крај.

Фотографскиот материјал од викиекспедицијата можете да го погледнете на следнава врска.

Преку образовната програма на Викимедија МКД, учениците од средните училишта низ земјата имаат можност да се запознаат со процесот на создавање и уредување на содржини на Википедија. Преку оваа програма, младите учат како критички да пристапуваат кон информации, како правилно да користат извори и како да придонесуваат кон слободното знаење достапно за сите. Една од активностите што поттикнува активно учество и креативност се уредувачките натпревари, кој им овозможуваат на учениците да ги применат стекнатите вештини на конкретна тема.

Уредувачкиот натпревар на тема „Реки и езера“  започна на 6 октомври 2025 година и заврши на 26 октомври 2025 година. Овој натпревар имаше за цел да помогне во подобрување на постоечките и создавање на нови статии на темата „реки и езера“. Право на учество на натпреварот имаа исклучиво ученици средношколци. На натпреварот учествуваа 28 средношколци и вкупно беа напишани 112 статии.

Сите статии требаше да бидат напишани во склад со начелата и правилата на Википедија, па така сите статии мораа да бидат напишани на енциклопедиски стил и да имаат извори.  Статиите ги прегледуваше жири, кое беше составено од тројца википедијанци. Жирито ја донесе конечната одлука за победниците. Членовите на жирито ги прегледуваа сите статии и секоја ја бодуваа поединечно со бодови од 1 до 10. Па така со гордост ги објавуваме добитниците на награди:

• Прва награда: Горазд Војнески – вредносен купон во вредност од 6000 денари.
• Втора награда: Ritxyql – вредносен купон во вредност од 4000 денари.
• Трета награда: Doni12345 -вредносен купон во вредност од 2000 денари.

Покрај овие награди беа предвидени и награди за најдобри статии и тоа за секоја седмица поединечно. Добитниците на овие награди се следните:

• Прва седмицa: Doni12345  со статијата „Камел “– вредносен купон во вредност од 2.000 денари.
• Втора седмицa: Doni12345 со статијата „Ејвон“  – вредносен купон во вредност од 2.000 денари.
• Трета седмица: Doni12345 со статијата  Сарасвати (река) – вредносен купон во вредност од 2.000 денари.

Со овој натпревар, Викимедија МКД уште еднаш ја потврди важноста на соработката меѓу образованието и дигиталното знаење. Преку ваквите активности, младите стануваат дел од глобалната заедница на Википедија и придонесуваат кон развојот на слободното знаење на македонски јазик. Натпреварот „Реки и езера“ покажа дека ентузијазмот, љубопитноста и желбата за учење можат да создадат вредни содржини што ќе им служат на идните генерации.

Искрени честитки до сите добитници на награди за нивниот труд, посветеност и креативност! Воедно, голема благодарност до сите ученици кои учествуваа и со своите статии придонесоа кон збогатување на Википедија на македонски јазик. Вашиот ангажман е доказ дека младите луѓе можат да бидат двигатели на слободното знаење и да бидат позитивен пример во заедницата.