admin

Конференциите за наставници што ги организира Викимедија МКД претставуваат значаен сегмент од образовната програма на организацијата и имаат за цел да ги доближат можностите на Википедија до образовниот кадар. Преку овие настани, наставниците се запознаваат со концептот на слободно знаење, начинот на функционирање на Википедија и потенцијалот што го нуди како современа образовна алатка. Воедно, конференциите претставуваат простор за размена на искуства, идеи и добри практики, како и поттик за воспоставување долгорочна соработка меѓу училиштата и Викимедија МКД.

На 25.02.2026 година во просториите на СОУ „Богданци“ во Богданци се одржа конференција за наставници, на која учествуваа 16 наставници. Настанот се одвиваше во позитивна и интерактивна атмосфера, при што присутните имаа можност да поставуваат прашања и да дискутираат за практичната примена на Википедија во наставниот процес.

Најпрво, свое обраќање имаше Снежана Штрковска, извршен директор на Викимедија МКД, која зборуваше општо за Википедија, нејзината мисија и основните принципи – неутралност, проверливост и користење доверливи извори. Таа ја истакна важноста од развивање на критичко размислување кај учениците и нивно насочување кон одговорно користење и создавање на онлајн содржини. Притоа беше нагласена улогата на наставниците како ментори во процесот на креирање квалитетни и енциклопедиски содржини.

Во рамки на конференцијата, Боса Филиповиќ, менаџер за образовна програма на Викимедија МКД, ја презентираше образовната програма на организацијата, нејзината структура, тековните активности и постигнатите резултати. Таа ги информираше наставниците за можностите за вклучување во програмата, организирање обуки и формирање вики клубови во нивните училишта, со цел поттикнување на активно учество на учениците во создавање слободно знаење.

Валентина Трајковска, член на извршниот одбор на Викимедија МКД, сподели искуство од нејзината работа со вики клуб, посочувајќи конкретни примери за тоа како учениците преку вакви активности ги унапредуваат своите јазични и дигитални вештини. Таа зборуваше за предизвиците и придобивките од водењето на вики клуб, како и за позитивното влијание што ваквиот ангажман го има врз мотивацијата и самодовербата на учениците.

Конференцијата заврши со отворена дискусија и изразен интерес за идни соработки, при што наставниците ја истакнаа важноста од вакви едукативни иницијативи кои придонесуваат за модернизација на наставниот процес и активно вклучување на учениците во дигиталната средина.

Конференциите за наставници претставуваат значаен чекор кон градење посилна мрежа на соработка меѓу наставниците и Викимедија МКД, создавајќи основа за нови проекти, вики клубови и заеднички активности. Преку континуирана поддршка и едукација, се отвораат можности за активно учество на учениците во креирањето на квалитетна и слободна содржина на македонски јазик, со што директно се придонесува кон збогатување на Википедија и развој на дигиталната писменост во образованието.

Фотографскиот материјал од конференцијата може да го погледнете на следнава врска.

На 23 февруари 2026 година, во просториите на ООУ „Невена Георгиева Дуња“ се одржа едукативна обука за уредување на Википедија на македонски јазик, во организација на Викимедија МКД. Обуката беше реализирана како дел од активностите за поттикнување на младите да се вклучат во создавање слободна содржина и активно да придонесуваат кон развојот на Википедија на македонски јазик.

На обуката учествуваа 8 ученици, кои покажаа голем интерес за процесот на уредување и креирање енциклопедиски статии. Обуката започна со воведен дел, на кој учениците се запознаа со историјатот и значењето на Википедија како најголема слободна енциклопедија во светот, како и со улогата на Викимедија МКД во поддршката и развојот на заедницата на уредувачи во Македонија. Посебен акцент беше ставен на значењето на слободното знаење, одговорното користење на информации од интернет и почитувањето на енциклопедиските стандарди.

Во практичниот дел од обуката, учениците работеа на отворање кориснички сметки и се запознаа со основните алатки за уредување. Тие научија како се структурира една статија, како се користат наслови и поднаслови, како се вметнуваат внатрешни врски, категории и шаблони, како и како текстот да биде јасен, неутрален и енциклопедиски оформен. Преку директна работа на Википедија, учениците имаа можност веднаш да ги применат стекнатите знаења и да видат како нивниот придонес станува дел од слободната енциклопедија.

Обуката беше тематски поврзана со тековниот уредувачки маратон „Медалисти на ЗОИ 2026“, кој има за цел да ја збогати Википедија на македонски јазик со содржини за спортистите што освоиле медали на Зимските олимписки игри 2026. Учениците работеа на превод и прилагодување на статии од англиската верзија на Википедија, водејќи сметка текстот да биде јазично и стилски соодветен на македонски јазик. Овој процес им овозможи да развијат вештини за внимателно читање, селекција и обработка на информации, како и за нивно соодветно енциклопедиско претставување.

Во текот на обуката беа напишани вкупно 16 статии. Со тоа, учениците дадоа конкретен и видлив придонес кон збогатување на спортските содржини на Википедија на македонски јазик, особено во делот поврзан со олимписките медалисти. Нивната работа претставува значаен чекор кон намалување на јазичниот јаз меѓу различните јазични изданија на Википедија и зголемување на достапноста на информации на македонски јазик.

Покрај техничките вештини, обуката придонесе и за развој на тимска работа, одговорност и самостојност кај учениците. Тие активно дискутираа, си помагаа меѓусебно и со голема посветеност работеа на своите статии. Настанот покажа дека младите имаат потенцијал и мотивација да бидат активни создавачи на знаење, а не само негови корисници.

Викимедија МКД организира уредувачки маратон посветен на медалистите од Зимските олимписки игри 2026. Овој маратон има за цел да ја збогати Википедија на македонски јазик со точни, проверени и детални информации за најуспешните спортисти кои освоиле медали на ова големо спортско натпреварување. Со создавање и уредување статии за овие олимписки медалисти, маратонoт овозможува ширење на знаење, зачувување на спортската историја и обезбедување трајна и достапна база на информации која ќе биде корисна за сите идни генерации и љубители на спортот.

Маратонoт се одржува на 23 февруари 2026 година и трае цел ден. Учесници може да бидат сите кои имаат интернет-врска и корисничка сметка на Википедија, без разлика на нивното претходно искуство во уредувањето на статии. Заинтересираните учесници ќе можат да изберат статија од списокот со медалисти кои сè уште не се опфатени на Википедија на македонски јазик. Целта е секоја статија да биде детална и информативна, со минимум од околу 500 зборови или повеќе од 5000 бајти, за да се обезбеди квалитетна и проверлива содржина која ќе служи како релевантен извор на информации.

Учесниците треба да ги додаваат своите статиите во список со резултати на маратонoт, што овозможува следење на нивното учество и бројот на создадени и уредени статии. Наградата ќе биде извлечена по случаен избор, јавно и во живо, на инстаграм профилот на здружението.

Овој уредувачки маратон претставува повеќе од обичен натпревар во пишување и уредување. Тоа е можност за градење заедница, промовирање на култура на соработка и поттикнување на граѓанската ангажираност во создавањето на бесплатни и отворени извори на знаење. Секоја статии создадена во рамките на маратонoт значи нов придонес кон зачувувањето на спортската историја и промовирањето на медиумски проверливи информации за спортистите на меѓународната сцена.

Маратонoт е отворен за сите, од почетници до искусни уредници, и овозможува секој учесник да ги развива своите пишувачки способности и да создава содржина која е проверлива и точна. Преку овој процес, учесниците стануваат дел од глобалната заедница на википедијанци, учествувајќи во заедничка мисија за ширење на слободно знаење на македонски јазик.

Викимедија МКД ги повикува сите заинтересирани да се вклучат во овој маратон, да создадат нови статии и да придонесат кон создавање на квалитетна и трајна база на знаење на Википедија на македонски јазик и за спортската историја на олимписките игри.

На 20 февруари 2026 година, во просториите на Викимедија МКД, сместени во Младински културен центар (МКЦ) во Скопје, се одржа обука за уредување на Википедија наменета за ученици од СУГС Гимназија „Јосип Броз Тито“. Настанот беше реализиран како дел од образовните активности на Викимедија МКД насочени кон вклучување на младите во создавањето слободна енциклопедиска содржина на македонски јазик.

На обуката учествуваа 5 ученици, под менторство на професорката Ирена Трајковска Стерјовска, кои покажаа интерес за стекнување практични знаења и вештини поврзани со уредување на Википедија. За нив ова беше прво директно запознавање со процесот на создавање статии.

Обуката беше организирана во два дела. Во првиот дел, Боса Филиповиќ, менаџер за образовна програма во Викимедија МКД, одржа предавање во кое ги запозна учениците со мисијата на Википедија и со улогата на волонтерите-уредници во нејзиното развивање. Таа говореше за значењето на слободното знаење, за можноста секој да придонесе со пишување и подобрување на статии, како и за начинот на кој се гради и проширува содржината на Википедија на македонски јазик. Учениците беа запознаени со техничките аспекти на уредување — отворање корисничка сметка, користење на визуелниот уредувач, поставување на наслови и поднаслови, додавање внатрешни врски и категории, како и основно средување на изгледот на статијата.

Во вториот дел од обуката следеше практична работа, која претставуваше и најдинамичниот сегмент од настанот. Учениците избраа теми што веќе постојат на англиската верзија на Википедија и започнаа со нивно преведување и прилагодување на македонски јазик. Работејќи индивидуално, но со постојана поддршка од менторката и од присутните обучувачи, тие го обликуваа текстот во енциклопедиски стил, внимаваа на јазичната точност и на соодветната терминологија. Во текот на неколкучасовната работа беа успешно напишани вкупно 5 нови статии, со што учениците директно придонесоа кон проширување на содржината на Википедија на македонски јазик.

Вики клубовите претставуваат важен дел од образовните и младинските активности насочени кон поттикнување на дигиталната писменост, критичкото размислување и активното учество во создавање слободно знаење. Преку организирани обуки за уредување на Википедија, учениците и младите се запознаваат со основните принципи на енциклопедиското пишување, како и со техничките аспекти на уредување на содржини. Овие активности не само што придонесуваат кон збогатување на содржината на Википедија на македонски јазик, туку и ги охрабруваат младите да споделуваат знаење со пошироката заедница.

На 19 февруари 2026 година во Демир Хисар се одржа работилница за уредување на Википедија за членовите на локалниот вики клуб. Настанот се реализираше во салата за состаноци на ОУ „Гоце Делчев“ во Демир Хисар, под менторство на координаторката на вики клуб Демир Хисар, Александра Шундовски во пријатна и работна атмосфера што овозможи активно учество и посветена работа. На работилницата учествуваа пет ученици, кои со голем ентузијазам се вклучија во активностите.

Фокусот на работилницата беше на практична работа – создавање и уредување статии поврзани со добитници на медали од Зимски олимписки игри 2026. Учениците работеа на преведување и прилагодување на содржини од англиската верзија на Википедија на македонски јазик, водејќи сметка за стилот, енциклопедискиот тон и техничките елементи како вметнување внатрешни врски и категории. Во текот на работилницата беа напишани вкупно седум нови статии за спортисти кои освоиле медали на овие игри.

Работата се одвиваше тимски, со меѓусебна поддршка и размена на искуства, што придонесе за поефикасно совладување на техничките аспекти на уредувањето. Учениците покажаа одговорност и внимателност при обработката на содржините, со цел текстовите да бидат јасни, точни и прилагодени на енциклопедискиот формат.

Со реализацијата на оваа работилница, вики клубот во Демир Хисар уште еднаш го потврди својот континуитет и посветеност кон збогатување на содржините на Википедија на македонски јазик. Седумте новосоздадени статии претставуваат конкретен придонес кон спортската тематика, а учениците стекнаа дополнителна сигурност и искуство во самостојно уредување, што ќе им користи и во идните активности на клубот.

На 17 февруари 2026 година, Викимедија МКД го реализираше уредувачкиот ден на тема „Острови во Хрватска“, кој донесе многу успешни резултати и значително збогатување на содржините на Википедија на македонски јазик. Во рамки на активноста учествуваа 14 уредници, кои во текот на денот создадоа вкупно 52 нови статии – што претставува еден од најуспешните уредувачки денови досега.

Со овој резултат не само што се напишаа голем број на статии, туку и се покажа континуираниот раст на продуктивноста меѓу уредниците. Темата „Острови во Хрватска“ овозможи систематско и стратешко проширување на енциклопедиската содржина поврзана со географијата на Јадранското Море. Беа опфатени бројни острови – од поголеми и познати, до помали и помалку обработени – со податоци за нивната местоположба, површина, релјеф, административна припадност, население и други релевантни карактеристики. Со ова значително се подобри покриеноста на оваа област на Википедија на македонски јазик, а читателите добија пристап до структурирани и проверливи информации на македонски јазик.

Уредувачките денови и уредувачките викенди претставуваат важен сегмент од програмските активности на Викимедија МКД, бидејќи овозможуваат фокусирана работа на конкретна тема, поттикнување на активноста во заедницата и создавање мерливи резултати во краток временски период. Тие се покажаа како ефикасен модел за систематско пополнување на содржински празнини и за унапредување на опфатот на различни тематски области.

Рекордните 52 нови статии се јасен показател дека заедницата на уредници е мотивирана и посветена на својата мисија – развој и унапредување на слободното знаење на македонски јазик. Со вакви резултати, се поставуваат високи стандарди и позитивни очекувања за следните уредувачки денови, кои несомнено ќе продолжат да ја збогатуваат Википедија со квалитетни и корисни содржини.

На 16 февруари 2026 година, Викимедија МКД организираше обука за уредување на Википедија за ученици од основното училиште „Јохан Хајнрих Песталоци“ во Скопје. Настанот се реализираше во рамките на образовната програма на здружението, со цел учениците да се запознаат со основите на уредувањето и активно да се вклучат во збогатување на содржините на Википедија на македонски јазик.

На обуката учествуваа 6 ученици и 2 професорки од училиштето под менторство на професорката Бранка Ивановска-Блажевска. Тие имаа можност да се запознаат со начинот на функционирање на Википедија и со практичните чекори при создавање и подобрување на статии.

Активноста започна со кратко воведно предавање од Боса Филиповиќ, менаџер за образовна програма на Викимедија МКД. Во своето излагање таа ги запозна учениците со мисијата и значењето на Википедија како слободна енциклопедија што ја уредуваат самите корисници, како и со можностите што ги нуди за стекнување нови знаења и вештини. Беше направен краток осврт на техничките аспекти на уредувањето, начинот на преведување содржини и приспособување на текстовите на македонски јазик.

По воведниот дел следуваше практична работилница, во рамките на која учениците работеа на преведување и прилагодување на статии од англиската верзија на Википедија на македонски јазик. Со поддршка од менторката и присутните обучувачи, тие се фокусираа на јазична прецизност, енциклопедиски стил и соодветно структурирање на текстот. Учениците покажаа висок степен на ангажираност, соработка и интерес за процесот на уредување.

Како резултат на нивната работа, беа напишани и објавени вкупно 18 статии на Википедија на македонски јазик, со што директно придонесоа кон збогатување на содржините достапни на македонски јазик.

Оваа обука претставува значаен чекор во поттикнување на младите да станат активни учесници во создавањето знаење. Преку практична работа, учениците стекнаа искуство во преведување, обработка и прилагодување на енциклопедиска содржина, како и поголема самодоверба во користењето на дигитални алатки.

Викимедија МКД продолжува со реализација на вакви активности во соработка со образовни институции, со цел унапредување на содржините на македонската Википедија и поттикнување на младите да бидат дел од глобалната вики-заедница.

Фотографскиот материјал од обуката може да го погледнете на следнава врска.

На 13 февруари 2026 година, Викимедија МКД организираше обука за уредување на Википедија, наменета за ученици од училиштата ООУ „Невена Георгиева- Дуња“ и ООУ „Свети Климент Охридски“. Обуката се одржа во просториите на Викимедија МКД, сместени во рамките на Младински културен центар (МКЦ) во Скопје, во пријатна и инспиративна атмосфера која поттикнува учење, креативност и тимска работа. На настанот учествуваа вкупно 9 ученици, кои имаа можност да се запознаат со основите на уредување статии и со начинот на функционирање на Википедија како слободна и заеднички уредувана енциклопедија.

Во текот на обуката беше објаснето дека најчестиот начин на создавање нови статии, особено за почетници, е преку преведување содржини од други јазични изданија на Википедија. Учениците научија како правилно да преведуваат, да ја прилагодуваат содржината на македонски јазик и да внимаваат на јазичната точност и енциклопедискиот стил. Посебен акцент беше ставен на зачувување на структурата на статијата – вовед, поднаслови и категории – со цел новосоздадените статии да бидат уредни, прегледни и во согласност со стандардите на македонската Википедија.

Практичниот дел од обуката им овозможи на учениците самостојно да започнат со работа на статии по сопствен избор, под менторство и поддршка од тимот на Викимедија МКД. Како резултат на обуката, беа напишани вкупно 14 нови статии. Со тоа, учениците дадоа конкретен придонес во збогатувањето и проширувањето на содржините Википедија на македонски јазик, зголемувајќи ја достапноста на информации на мајчин јазик.

Покрај практичните вештини за уредување и преведување, учениците ја унапредија и својата дигитална писменост, способноста за јазична прецизност и внимателност при пренесување информации. Обуката претставува значаен чекор во нивното активно вклучување во заедницата на уредувачи и во процесот на создавање слободно знаење.

Со ваквите активности, Викимедија МКД продолжува да ја остварува својата мисија за едукација и поттикнување на младите да станат активни придонесувачи во развојот на Википедија на македонски јазик, градејќи одржлива и мотивирана заедница на нови уредувачи.

Во рамките на образовната програма на Викимедија МКД, која има за цел да го поттикне користењето и создавањето слободно знаење меѓу учениците и наставниците, редовно се организираат обуки и работилници за уредување на Википедија. Програмата е насочена кон развивање на дигитална писменост, преку нивно активно вклучување во збогатување на содржините на Википедија на македонски јазик.

Па така, на 12 февруари 2026 година, Викимедија МКД одржа обука за уредување на Википедија со ученици од ООУ „Коле Неделковски“ во Скопје. Настанот се реализираше во пријатна и работна атмосфера, со цел учениците да се запознаат со основите на слободното знаење и начинот на функционирање на најголемата онлајн енциклопедија во светот – Википедија.

На обуката учествуваа вкупно 6 ученици, кои покажаа голем интерес и мотивација за активно вклучување во процесот на создавање и подобрување на енциклопедиски содржини на македонски јазик. Преку теоретски и практичен дел, тие се запознаа со принципите на Википедија, правилата за уредување, како и со техничките аспекти на креирање и уредување статии.

Во текот на обуката учениците имаа можност самостојно да работат на пишување нови статии, при што беа напишани вкупно 15 статии на различни теми. Притоа, тие научија како правилно да структурираат текст, да додаваат внатрешни и надворешни врски, да внесуваат наводи и да категоризираат содржина.

Обуката претставуваше одлична можност учениците да ги развијат своите дигитални вештини, како и критичкото размислување при користење на информации од интернет. Преку практичната работа тие стекнаа директно искуство во создавање слободна и достапна содржина, со што активно придонесоа кон збогатување на Википедија на македонски јазик.

Викимедија МКД продолжува со организирање на вакви едукативни активности со цел поттикнување на младите да станат активни создавачи на знаење и одговорни корисници на дигитални ресурси. Соработката со училиштата претставува важен чекор во ширењето на мисијата за слободно знаење и развој на заедницата на уредувачи во Македонија.

Фотографскиот материјал од обуката, може да го погледнете на следнава врска.

Конференциите за наставници претставуваат еден од клучните проекти на Викимедија МКД, насочен кон унапредување на образованието преку користење на слободни и отворени образовни ресурси. Преку овие конференции, Викимедија МКД има за цел да ги запознае наставниците со можностите што ги нуди Википедија и сродните вики-проекти, како и да поттикне нивна активна примена во наставниот процес. Проектот е насочен кон развој на дигиталната писменост, критичкото размислување и активно учество на учениците во создавањето знаење.

Во рамки на овој проект, на 11.02.2026 година се одржа конференција за наставници во основното училиште „Видoe Подгорец“, кое се наоѓа во селото Колешино, Струмица. Настанот беше организиран во соработка со училиштето и беше наменет за наставниот кадар, со цел да се претстават можностите за користење на Википедија како современа образовна алатка и да се охрабрат наставниците да ги вклучат учениците во активности поврзани со слободното знаење.

Конференцијата започна со излагање на Снежана Штрковска, извршен директор на Викимедија МКД. Во своето обраќање таа зборуваше општо за Википедија, нејзината историја, принципите на слободно знаење и начинот на функционирање на оваа глобална енциклопедија. Таа истакна дека Википедија е еден од најкористените извори на информации во светот, но и дека е важно наставниците и учениците да знаат како правилно и одговорно да ја користат, со посебен акцент на проверка на извори, неутралност и точност на информациите.

По неа, свое излагање имаше Боса Филиповиќ, менаџер за образовната програма на Викимедија МКД, која детално ја претстави образовната програма на организацијата. Таа зборуваше за целите на програмата, за моделите на соработка со основни и средни училишта, како и за начините на кои уредувањето на Википедија може да се интегрира во наставата по различни предмети. Во своето излагање, таа посочи дека учениците преку оваа програма не само што стекнуваат знаења, туку развиваат и вештини за истражување, тимска работа и одговорно користење на дигитални алатки.

Во продолжение, Лили Арсова, координаторка на Вики клуб Велес, го сподели своето практично искуство од работата со ученици во рамки на вики клубот. Таа зборуваше за процесот на формирање и одржување на вики клуб, за мотивацијата на учениците, како и за позитивното влијание што редовното уредување на Википедија го има врз нивната самодоверба и интерес за учење. Нејзиното излагање беше особено значајно за наставниците, бидејќи понуди конкретни примери и идеи кои можат да се применат и во други училишта.

На конференцијата присуствуваа 30 професори, кои со внимание ги следеа излагањата и активно учествуваа во дискусијата. Наставниците покажаа интерес за можностите за понатамошна соработка со Викимедија МКД, како и за вклучување на учениците во идни активности поврзани со уредување на Википедија и користење на отворени образовни ресурси.

Истиот ден, по завршувањето на конференцијата за наставници, беше отворен и започна со работа вики клубот во истото училиште и беше организирана обука за учениците од вики клубот за уредување на Википедија. Обуката имаше едукативен и практичен карактер и беше наменета за ученици кои за првпат се запознаа со основните правила и принципи на Википедија.

На обуката учествуваа 8 ученици, кои под менторство на обучувачите од Викимедија МКД научија како да креираат и уредуваат статии и како да придонесуваат со квалитетна содржина. Како резултат на оваа активност, беа напишани 9 статии на Википедија, со што учениците дадоа конкретен придонес кон збогатување на содржините на македонски јазик.

Со одржувањето на вакви настани, Викимедија МКД продолжува активно да работи на зајакнување на соработката со образовните институции низ државата и на промоција на слободното знаење. Конференцијата и обуката во основното училиште „Видoe Подгорец“ во село Колешино претставуваат уште еден чекор кон создавање поотворена, подигитална и поинклузивна образовна средина.

Фотографскиот материјал од Конференцијата за наставници може да го погледнете на следнава врска, а од обуката за ученици од вики клубот во Колешино тука.